Hatutan.com, (31 Jullu 2023), Díli—IX Governu Konstitusionál liuhosi Ministériu Interiór (MI), oras ne’e prossesa hela dokumentu importante sira bá membru Polísia Nasionál Timor-Leste (PNTL) hamutuk na’in-158 ne’ebé antes ne’e reforma ona, sei reativa fali sira-ninia servisu iha Komandu PNTL.
![](https://www.hatutan.com/wp-content/uploads/2023/06/Membru-Polisia-Reformadu-300x175.jpeg)
Serimónia despedida ne’ebé organiza hosi Komandu PNTL bá membru na’in-158, ho idade kompleta ona tinan 60 atu fila ona bá vída sivíl, iha Sentru Formasaun Polísia nian (CFP-Sigla Português), iha Comoro, Díli, Sesta (16/06/2023). Foto/Elio dos Santos da Costa.
Prossesu sira ne’ebé mak daudaun ne’e ekipa tékniku sira Ministériu Interiór nian hala’o hela maka, iha Segunda 31 fulan Jullu 2023 distribui no fasilita ona formuláriu rua ho tipu ne’ebé la hanesan, atu membru reformadu sira ne’e bele priénxe hikas.
Lee Mós: IX Governu Sei Dignifika Membru PNTL Reformadu 158
Eis Komissáriu PNTL no atuál assesór iha Gabinéte Ministru Interiór nian, Paulo Fátima Martins informa, preparasaun bá dokumentu sira ne’e la’o hela no bainhira fila-fali bá servisu, sira sei kontinua simu saláriu fulan-Juñu ho Jullu nian, tanba desizaun Governu anteriór nian, suspende tiha sira-nia saláriu.
“Tanba ne’e mak ita sei halo hela prossesu bá sira na’in-158. Ohin sira mai atu prienxe fali formuláriu rua. Ida, kona-bá sira retira fali dokumentus ne’ebé uluk sira assina iha komandu no ida fali, sira assina tán dokumentu ida, katak sira fali-fali bá komandu, bá servisu fila-fali,” Paulo Martins hateten iha Sentru Formasaun Polísia Comoro, Segunda (31/07/2023).
Assesór Paulo Martins esplika, faze asinatura bá dokumentu sira ne’e iha rua. Primeiru maka membru reforma sira hosi munisipiu lima (5) ne’ebé besik, hanesan Dili, Liquiçá, Ermera, Aileu ho Manatuto.
Tuir oráriu, iha Kinta (03/08/2023), reformadu sira hosi Rejiaun Administrativa Espesiál Oecusse Ambeno (RAEOA), Covalia, Bobonaro, Ainaro, Manufahi, Baucau, Lospalos ho Viqueque.
Bainhira konklui tiha prienximentu bá dokumentu importante ne’e, tékniku sira sei hato’o relatóriu bá Ministru Interiór (MI), Francisco Guterres no hafoin lori bá aprezenta iha sorumutu Konsellu Ministru nian, hodi hetan apresiasaun no desizaun ikus, molok reformadu sira fila-fali bá servisu iha komandu.
Antes ne’e Primeiru Ministru (PM), José Alexandre Kay Rala Xanana Gusmão hateten ona iha ninia diskursu serimónia tomada-de-posse bá membru IX Governu konstitusionál nian, iha Palásiu Prezidensiál, Ai-tarak laran, Díli, Sábadu (01/07/2023) katak, iha ninia lideransa ne’e sei haree fali prossesu ilegál bá apozentasaun forsada, ne’ebé afeta bá ajentes PNTL barak tebes.
Antes ne’e mós Provedoria Direitus Umanus no Justisa (PDHJ)husu ona bá Prezidente Tribunál Rekursu (PTR), Deolindo dos Santos atu halo fiskalizasaun abstrata konstitusionalidade bá artigu 128 hosi Dekretu-Lei númeru 69/2022, loron 28 fulan-Setembru (Estatutu profisionál pesoál ho funsaun polisiál iha Polísia Nasionál Timor-Leste).
Lee Mós:PDHJ Husu TR Halo Fiskalizasaun Abstrata Konstitusionalidade bá Artigu 128 Hosi Dekretu-Lei númeru 69/2022
Jornalista: Rogério Pereira Cárceres