Hatutan.com, (02 Agostu 2023), Díli- Mézmu Komandu Jerál Polísia Nasionál Timor-Leste (PNTL) kontínua enfrenta  difikuldade lubun, maibé Xefe Estadu enkoraja nafatin atu halo servisu hotu ho profisionál, disiplina no liuliu buka hametin seguransa iha liña fronteira sira Timor-Leste nian.

Lee Mós : Komisáriu Faustino ho Vise-Ministru Interiór Preokupa Númeru UPF Iha Fronteira Limitadu

F-FDTL ho UPF hala’o patrulla konjunta iha área fronteira terrestra TL-RI. Foto/Dok. Eugénio Pereira.

Xefe Estadu José Ramos-Horta hato’o nia mensajen ne’e bá Komisáriu Jerál Polísia  Henrique da Costa liuhosi enkontru semanal ne’ebé hala’o iha Palásiu Prezidensiál, Díli, Kuarta (02/08/2023). Nia husu bá Komandu PNTL atu reforsa seguransa iha área fronteira hodi asegura movimentasaun ilegal ne’ebé lori risku bá nasaun no povu Timor-Leste.

“Xefe Estadu husu PNTL reforsa ita-nia seguransa iha fronteira, Xefe Estadu mós husu PNTL nafatin hala’o ninia kna’ar ho di’ak, no hatudu profisionalizmu polísia ninian. Mezmu polísia  enfrenta difikuldade lubuk ida, hanesan rekursu umanu, transporte, komunikasaun, maibé PNTL nafatin hala’o nia kna’ar ho rekursu ne’ebé iha,” Komandante Jerál PNTL, Komisáriu Jerál Polísia Henrique da Costa haktuir bá jornalista sira.

Nia hatutan kona-bá ba fasilidade bá polísia fronteira ida ne’e mós  informa ba iha Xefe Estadu katak PNTL iha difikuldade ida mak transporte ho nia rekursu umanu ne’ebé sei limitadu tebes koloka iha liña fronteira Timor-Leste nian.

“Ita nafatin ho meius ne’ebé ita iha ne’e, ita iha esforsu nune’e fó nafatin kualidade atendimentu,” Nia subliña.

Jornalista: Vito Salvadór