Hatutan.com, (08 Agostu 2023), Jakarta—Prezidente Parlamentu Nasionál (PPN), Maria Fernanda Lay, reiteira Timor-Leste ninia dezeju atu adere bá ASEAN no husu bá nasaun sira membru Asembleia Inter Parlamentar ASEAN (AIPA) nia tulun atu Timor-Leste iha faze preparativu tuir ‘roadmap’ ne’ebé ASEAN hatuur ona bá TL.
Lee Mós : Adezaun TL bá ASEAN Sai Prioridade IX Governu Konstitusionál
PPN Maria Fernanda Lay halo intervensaun iha plenária Asembleia Inter Parlamentar ASEAN bá dala-44 iha Jakarta, Segunda (07/08/2023). Foto/Supply
PPN Maria Fernanda Lay hato’o nia pontu de vista ne’e iha sesaun plenária Asembleia Inter Parlamentar ASEAN bá dala-44 iha Jakarta, Segunda (07/08/2023). PPN Maria Fernanda Lay ho nia delegasaun, kompostu hosi Vise Prezidente PN Teresinha Viegas, Deputada Maria Angélica Rangel ho Deputada Sancha Margarida Tilman, partisipa iha Asembleia Inter Parlamentar ASEAN ba dala-44 ne’ebé realiza iha Jakarta hosi loron 5 to’o 11 fulan-Agostu 2023.
Kontribuidór Hatutan.com nian iha Jakarta relata katak iha sesaun plenaria Asembleia Inter Parlamentar ASEAN (AIPA), ne’e Prezidente PN Maria Fernanda Lay hato’o ninia pontu de vista no kompromisu Timor-Leste nian bá pás, estabilidade no prosperiedade iha rejiaun ASEAN.
Iha loron hanesan, Prezidente PPN ho delegasaun halo enkontru bilateral ho nasaun tolu, Armenia, Ukráina, no Japaun hodi troka impresaun bá malu, partikularmente foka liu iha relasaun amizade no kooperasaun inter parlamentar.
Prezidente PN mos iha ajenda bá enkontru bilateral ho Ketua DPR-RI, Puan Maharani, delegasaun hosi Georgia, Austrália no Parliamentary Center of Asia.
Asembleia Jerál bá da-44 ASEAN Inter-Parliamentary Assembly (AIPA) ne’ebé hala’o hosi loron 5 to’o loron 11 fulan-Agostu 2023, ho tema sentrál ‘Responsive Parliaments for a Stable and Prosperous ASEAN’.
PPN Maria Fernanda Lay hasoru-malu ho Ketua DPR-RI, Puan Maharani. Foto/Supply
Tema ne’e atu hatudu forma ida bá kompromisu Parlamentu ASEAN nian atu kontribui bá harii pás no prosperidade iha rejiaun Sudeste Aziátiku.
Liuhosi Asembleia jerál AIPA bá da-44 ne’e atu diskute mós asuntu sira oioin iha rejiaun, liuliu kona-bá minimiza tensaun geopolitik tanba de’it kompetisaun entre forsa boot iha Sudeste Aziátiku.
Asembleia Jerál AIPA bá da-44 partisipa hosi Prezidente Parlamentu Nasionál hosi nasaun sia (9) iha ASEAN, inklui Indonézia. Partisipa mós reprezentante sira hosi nasaun observadór 18, inklui bainaka reprezentante hosi organizasaun internasionál sia (9) ne’ebé atu diskute mós esforsu harii ekonomia verde liuhosi enerjia renovável di Sudeste Aziátiku nu’udár apoiu intervensaun bá krize kromátika
(*/Hatutan.com)