Hatutan.com, (10 Agostu 2023), Díli—IX Governu Konstitusionál hatun hikas taxa importasaun hosi 5% bá 2,5% atu komersiánte sira bele hala’o atividade negósiu hodi bele kontribui bá rekoperasaun ekonómika no redúz impaktu inflasaun, inklui aumentu kustu vida bá sidadaun sira, hodi aumenta sira-nia podér kompra nian.

Vise-Ministru Finansas, Helder Lopes. Foto/Elio dos Santos da Costa.

“Agora daudaun folin sasán sa’e makas. Bainhira Lei ne’e  aprova, Governu hatun tia Lei impostu direitu ba importasaun ne’e bele tun hosi 5% bá 2.5% ida-ne’e mós bele kontribui ba sasán importasaun  nia folin, ida ne’e maka ninia razaun,” Vise-Ministru Finansas, Helder Lopes hateten iha Otél Novo Turizmu, Kinta (10/08/2023).

Lee Mós: Governu Hatun Ona Taxa Hosi 5% bá 2,5%

konsellu Ministru aprova Lei Orsamentu Retifikativu atu altera Lei tolu, alterasun primeiru halo ba Lei Orsamentu Jerál Estadu 2023 nian, iha ne’ebá altera artigu tolu, ida maka hatun fila-fali kona-bá folin masimidar nian ne’ebé uluk $1 kada kilograma, fila-fali ba normál hanesan uluk.

Advertisement

Alterasun segundu maka, hatun tia taxa kona-bá direitu importasaun, Governu anteriór hasa’e hosi 2.5% ba 5% ne’e hatun fali ba  2.5%, ho razaun primeiru tanba ekonomia TL sidauk rekoopera to’o iha nivel Pandemia Covid-19.

“Agora rekoopera daudaun ita nia ekonomia maibé seidauk rekoopera hotu. Ita labele fó fali todan ne’e ba impostu ekonomia. Tuir ami nia haree, hatun tiha impostu importasaun nian nune’e bele kontribui ba rekooperasaun ekonomia atu bele fasilita seitór privada sira liu-liu komersiante sira bele hala’o atividade negósiu no mós bele kontribui ba sasán nia folin tun,” Helder Lopes esplika.

Governu rekeoñese katak, bainhira hatun taxa ne’e lakon duni respeita oitoan maibé ninia benefísiu ne’ebé hetan ne’e boot liu tanba hakarak kontribui ba rekooperasaun ekonomia.

“Iha futuru maka buat hotu la’o di’ak, ita bele haree fali kona-bá polítika impostu ninian,” nia subliña.

Jornalista: Vito Salvadór

Advertisement