Hatutan.com (07 Setembru 2023), Díli- Prezidente Repúblika (PR), José Ramos-Horta propoin ona atu nemeia kuadru partidu FRETILIN balun hodi hala’o misaun diplomata iha rai-li’ur hanesan embaixador Timor-Leste nian.

Lee Mós: Nomeia bá Governadór BCTL, Vise-Ministru Finansas Helder Lopes Sei Hein Dokumentu Ofisiál

Prezidente Repúblika, José Ramos-Horta. Foto/Elio dos Santos da Costa

Daudaun ne’e informasaun ne’ebé Hatutan.com asesu hosi fontes balun husi Palásiu Prezidensiál  ne’ebé husu atu labele publika nia identidade katak kuadru FRETILIN na’in-tolu mak atualmente tama ona iha lista ne’ebé propoin hosi Prezidente Repúblika, José Ramos-Horta no hetan mós aseitasaun hosi Primeiru-Ministru (PM), Xanana Gusmão, atu nomeia nu’udár Embaixadór.

Kuadru FRETILIN nian na’in-tolu ne’e mak  hanesan; Alex Tilman nomeia  hanesan embaixadór Timor-Leste nian  bá Singapura,  Lukenu Alkatiri hanesan Embaixadór bá Tailándia ho Adaljiza Albertina Xavier Reis Magno nomeia nu’udár Embaixadora bá Nova Zelándia.

Fones ne’e hatutan, Alex Tilman ho Lukenu Alkatiri konfirma ona sira-nia disponibilidade hodi asume misaun Estadu Timor-Leste nian ne’e hodi hala’o misaun diplomata iha nasaun sira ne’ebé sira atu bá. Maibé eis-Ministra Negósiu Estranjeiru no Kooperasaun iha Governu da-8 nian, Adaljiza Magno mak sei tetu no seidauk hatudu nia prontidaun atu bá hala’o kna’ar nudár embaixadora bá Nova Zelándia.

Prezidente Repúblika (PR), José Ramos-Horta afirma sei halo mudansa ba Embaixadór hotu-hotu Timor-Leste nian maibé sei lahalo politizasaun ba Embaixadór foun sira ne’ebé sei representa estadu Timor-Leste iha rai liur.

Bainhira Hatutan.com konfirma  ho Prezidente Repúblika (PR), José Ramos-Horta, nia la responde detallu kona-bá nomeasaun kuadur partidu FRETILIN nian na’in-tolu ne’e. Ramos-Horta ho diplomasia lia-tun dehan, nomeasaun bá Embaixadór foun sira sei la haree bá kór partidu polítika, tantu hosi FRETILIN, CNRT ka PD, importante mak iha koñesimentu di’ak no bele kontribui bá mandatu kooperasaun bilateral Timor-Leste nian iha rai-li’ur.

“Nomeasaun bá kargu embaixadór sei laiha politizasaun. Ha’u la haree bá kuadru ne’e FRETELIN ka CNRT, ha’u hare bá ema nia estudu, ema nia koñesimentu bá língua, nia matenek no buat sira ne’e hotu. Ne’e mak Ha’u ko’alia ho maun boot Xanana no nia konkorda no nia (Xanana-red)hateten laiha politizasaun,” José Ramos-Horta hateten hodi responde Hatutan.com bainhira vizita Ospitál Nasionál Guido Valadares (HNGV, sigla portugés), Kinta (07/09/2023).

Xefe Estadu afirma liután katak Embaixadór foun ne’ebé sei representa Estadu Timor-Leste tenke matenek no dominante iha língua, signifika nomeasaun bá embaixadór foun sira sei laiha politizasaun, ema ne’e bele FRETILIN, bele CNRT, bele PD ka bele independente.

“Embaixadór foun sei laiha politizasaun,  nia bele mai husi kuadrus partidu CNRT, FRETILIN, PD ou bele mós independente. Ha’u buka mak kuadru kareira nian, buka ema ne’ebé joven, jerasaun foun, ko’alia língua, estudu boot ne’e mak ha’u buka, mas la’ós ha’u mesak, ha’u konsulta ho Primeiru-Ministru, Prezidente la’ós nomeia arbiru.” Ramos-Horta subliña.

Informasaun seluk ne’ebé mós Hatutan.com asesu katak eis-Ministru Justisa  (2012-2017) nu’udár mós eis-Ministru Negósiu Estranjeiru no Kooperasaun (2017-2020)Dionísio da Costa Babo Soares, atuál Prezidente Komisaun Polítika Nasionál (CPN) partidu CNRT nian nomeia bá Embaixadór bá ONU.

Iha mós informasaun katak Sekretáriu Jerál Partidu Demokrátiku (PD) atuál Membru Parlamentu Nasionál António da Conceição nomeia bá Embaixadór Timor-Leste nian bá Indonézia  no Nivio Leite Magalhães nu’udár Embaixadór Timor-Leste bá Kuba.

Embaixadór Timor-Leste nian sira iha rai-li’ur sei troka hotu iha tempu badak nia laran no tuir Prezidente Repúblika,  José Ramos-Horta katak nia sei nomeia hikas embaixadór foun, joven no iha koñesimentu di’ak.   

Jornalista: Vito Salvadór