Hatutan.com, (15 Setembru 2023), Díli- Vise-Ministra Finansas, Felícia Claudinanda da Cruz Carvalho, kompromete servisu ho lealdade atu bele fó prestasaun ida di’ak bá povu Timor-Leste.

Lee Mós: Felícia Carvalho Substitui Helder Lopes nu’udár Vise-Ministra Finansas

PR José Ramos-Horta fó posse bá Vise-Ministra Finansas, Felícia Claudinanda da Cruz Carvalho, Sesta (15/09/2023). Foto/Elio dos Santos da Costa

Vise-Ministra Finansas, Felícia Claudinanda da Cruz Carvalho simu posse hosi Prezidente Repúblika José Ramos-Horta no akompaña husi Primeiru-Ministru Kay Rala Xanana Gusmão no Ministra Finansas inklui família sira iha salaun Xina, Palásiu Prezidensiál Nicolau Lobato Bairo Pite, Sesta (15/09/2023).

Vise-Ministra Finansas Felícia Claudinanda da Cruz Carvalho hato’o agradese bá Primeiru-Ministru (PM), Kay Rala Xanan Gusmão ho Prezidente Repúblika (PR), José Ramos Horta, no ema hotu-hotu ne’ebé fó konfiansa hodi asume kargu Vise-Ministru Finansas hodi troka eis Vise-Ministru Finasas  Helder Lopes.

“Ba konfiansa ida ne’ebé fó mai ha’u, knaar no oportunidade ida ne’e onra tebes hanesan Vise-Ministra Finansas, ha’u promete para servisu ho di’ak,” Felícia Claudinanda da Cruz Carvalho afirma.

Vise-Ministra ne’e promete atu servisu no asegura mandatu Ministériu Finansas (MF) hamutuk ho Ministra Finansas Santina Cardoso, inklui ekipa tomak hodi servisu di’ak bá povu Timor-Leste.

“Ha’u bá tiha servisu lai, espera katak sei hasoru malu iha loron seluk hodi ko’alia kona-bá asuntu relevante Ministériu Finansas nian,”  Nia hateten hodi hatán bá jornalista sira hafoin simu posse nu’udár Vise-Ministra Finansas.

Jornalista: Vito Salvadór