Hatutan.com, (19 Setembru 2023), Díli—IX Governu Konstitusionál liuhosi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, sei haruka tán traballadór Timoroan sira atu bá servisu iha nasaun Brunei Darussalam.

Reuniaun Konsellu Ministru IX Governu Konstitusional. Foto/Elio dos Santos da Costa.

Desizaun polítika ne’e ho baze bá rezultadu sorumutu Konsellu Ministru nian iha Tersa, 19 Setembru 2023 ne’ebé mak delibera ona hodi fó autorizasaun bá assinatura memorandum entendimentu nian entre Governu Timor-Leste ho Governu Brunei Darussalam, iha tempu badak.

Lee Mós: TMR Enkoraja Traballadór Timoroan bá Japaun Servisu ho Dixíplina

“Konsellu Ministru delibera ona hodi fó autorizasaun ba asinatura memorandum entendimentu entre Governu Timor-Leste, reprezenta hosi Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, no Governu Brunei Darussalam, bá programa haruka traballadór Timor-Leste ba servisu iha Brunei. Embaixadór Timor-Leste nian iha Brunei, Abel Guterres, sei mai apoia iha preparasaun bá traballadór nasionais,” Hatutan.com sita komunikadu.

Aprova Orgánika MTA

Konsellu Ministru mós aprova projetu Dekretu-Lei, ne’ebé aprezenta hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, kona-ba orgánika Ministériu Turizmu no Ambiente (MTA) nian.

Ministériu Turizmu no Ambiente ne’e hanesan departamentu governamentál ida ne’ebé responsável bá konsesaun, ezekusaun, koordenasaun no avaliasaun polítika, ne’ebé define no aprova ona hosi Konsellu Ministrus bá área turizmu no ambiente.

Entre atribuisaun oioin hosi MTA, inklui elaborasaun polítika no projetu lejizlasaun no regulamentasaun nesesáriu bá área sira ne’ebé iha nia tutela, apoiu bá implementasaun estratéjika dezenvolvimentu “Ekonomia Azúl”, avaliasaun no lisensiamentu emprendimentu turístiku, inspesaun no fiskalizasaun bá atividade turístika sira, nune’e mós protesaun ambiente no biodiversidade. Responsável mós hodi estabelese mekanizmus kolaborasaun no kooperasaun ho organizmu nasionál no internasionál sira ne’ebé ninia asaun ba área sira atuasaun Ministériu nian hodi simplifika prosesu sira lisensiamentu nian iha setór turizmu.

Konsellu Ministrus aprova Projetu Dekretu-Lei, ne’ebé aprezenta hosi Vise-Primeru-Ministru no hosi Ministru Koordenadór Asuntus Ekonómikus no Sekretáriu Estadu Kooperativas, Arsénio Pereira da Silva, kona-bá orgánika Sekretaria Estadu Kooperativas (SEKOOP) nian.

Sekretária Estadu Kooperativas inklui órgauns no servisus lubun ne’ebé apoia Sekretáriu Estadu Kooperativas bainhira ezerse ninia kompeténsia sira, hodi responsábiliza ba promosaun no fortalesimentu setór ekonomia sosiál nian, liuhosi hakle’an kooperasaun entre Estadu no organizasaun sira ne’ebé integra setór kooperativu, ho objetivu atu estimula sira-nia poténsia ba servisu dezenvolvimentu sósiu ekonómiku nasaun nian.

Haree bá importánsia hodi dezenvolve planu estratéjiku ida atu promove, organiza, investe iha formasaun ba rekursus umanus, kapasitasaun institusionál, apoia no hasa’e atividade produsaun produtus kooperativus nian iha área rurál sira nu’udár baze ekonomia nasaun nian, nune’e Sekretaria Estadu Kooperativas hakarak fó ba sira estrutura funsionál ida ne’ebé hetan meius ne’ebé permite atu aumenta efikásia, efisiénsia no kualidade servisus ne’ebé tuir lei nu’udár sira-nia responsábilidade,  atu nune’e promove partisipasaun iha dezenvolvimentu ekonómiku no konsolida modelu kooperativu produsaun nian.

Aprova projetu Dekretu-Lei, ne’ebé aprezenta hosi Vise-Primeiru-Ministru no Ministru Koordenadór Asuntus Ekonómikus nomos hosi Sekretáriu Estadu Formasaun Profisionál no Empregu, Rogério Araújo Mendonça, kona-bá orgánika Sekretaria Estadu Formasaun Profisionál no Empregu (SEFOPE) nian.

SEFOPE nu’udár departamentu governamentál ne’ebé ho nia misaun atu tulun Ministru Koordenadór Asuntus Ekonómikus, iha konsesaun (kriasaun), implementasaun no supervizaun ba polítika, ne’ebé define no aprova ona hosi Konsellu Ministrus, bá área traballu, formasaun profisionál no empregu.

Sekretária Estadu Formasaun Profisionál no Empregu kompromete ona iha definisaun polítika traballu, formasaun profisionál no empregu nian, iha implementasaun estratéjia nasionál empregu no ezekusaun planu Edukasaun no formasaun téknika no profisionál (TVET, sigla iha lian ingleza).

SEFOPE nia objetivu mós atu mellora kompeténsias maun-de-obra nian, fasilita mobilidade no asesu bá oportunidade servisu, formasaun no estájiu profisionál sira, apoia dezenvolvimentu ekonómiku nasionál nu’udár nasaun ida ne’ebé joven tebes. Tanba ne’e, Estrutura Sekretária Estadu Formasaun Profisionál no Empregu nian hakarak efisiente no efikás, ho objetivu fornese formasaun profisionál ne’ebé kualifikada no ho kualidade nomos kria kampu traballu.

Polítika kriasaun emprégu no melloria kualidade nian formasaun profisionál nu’udár prioridades hosi Governu Konstitusionál IX, ho objetivu atu kontribui bá redusaun taxa dezempregu, redusaun ba taxa moris-ki’ak ho mínimu sai 10%, no mós kondisaun ba inkluzaun, moris-di’ak no dignidade ida ne’ebé boot tebes iha sosiedade.

Nomeia Virgílio Smith bá Prezidente ATTL,IP

Aprova ona mós projetu Rezolusaun Governu, ne’ebé aprezenta husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, hodi nomea Virgílio Smith ba kargu Prezidente Konsellu Diretivu ba Autoridade Turizmu Timor-Leste, I.P. (ATTL,IP) no Ildefonso de Carvalho ba kargu Vogál Konsellu Diretivu ATTL, IP, nian ba mandatu tinan haat, tau iha konsiderasaun ba ninia kompeténsia téknika no aptidaun hodi hala’o funsaun sira  temi ona.

Jornalista: Rogério Pereira Cárceres