Hatutan.com, (19 Setembru 2023), Díli— Grupu arte hamutuk haat kompostu hosi Timor Furak, Le – Ziaval, Arte Moris no Artista Fomoza Maria Vitória “Marvi” sei reprezenta Timor Leste (TL) iha Primeiru Asia Pasific Youth Folklore Festival Festival 2023 ne’ebé sei realiza iha Petalin Jaya, Kuala Lumpur, Malazia hahú 21 to’o 26 Setembru 2023.
Grupu arte hamutuk haat kompostu hosi Timor Furak, Le – Ziaval, Arte Moris no Artista Fomoza Maria Vitória “Marvi” sei reprezenta Timor Leste (TL) iha Primeiru Asia Pasific Youth Folklore Festival Festival 2023 ne’ebé sei realiza iha Petalin Jaya, Kuala Lumpur, Malazia hahú 21 to’o 26 Setembru 2023, realiza konferénsia imprensa iha Timor Plaza, Tersa (19/09). Foto: Hatutan.com.
Grupu arte kultura sira ne’ebé mak sei bá partisipa iha eventu internasionál ne’e iha kolaborasaun ho grupu sira seluk, hodi bele hetan oportunidade hanesan no bele aprezenta ho pakote ida ne’ebé mak kompletu liu hanesan ba ho dansa kulturál ka tradisionál, múzika, pintura no seluk tán.
Lee Mós: Marvi Ofisialmente Lansa Múzika “Iluzaun”
Ekipa ne’e kompostu hosi ema na’in-13 hanesan dansa kultura ema na’in-11, pintór na’in-ida no kantór na’in-ida.
“Hanesan onra boot ida no agradese ba patrosinadór sira ne’ebé iha inisiativa di’ak fó nafatin bá ami artista sira. Ami sei kolabora hamutuk atu kanta no ajuda mós kolega sira hosi Timor Furak no Le- Ziaval,” Reprezentante ekipa, Maria Vitoria hateten liu hosi Konferénsia Imprensa iha Timor Plaza Díli, Tersa (19/09).
Tuir planu, artista Timoroan Maria Vitória sei kanta múzika ho títulu “Tais” ne’ebé hakerek hosi Timoroan Mito Freitas.
Ekipa ne’e halo ona preparasaun durante fulan ida ho di’ak tebes, halo kolaborasaun no komunikasaun ho grupu haat ne’e.
Timor Furak no Le- Ziaval sei aprezenta dansa kultura ka tradisionál, Arte Moris sei aprezenta pinta no Marvi sei kanta no kolabora ho dansa tradisionál.
Ekipa ne’e sei arranka iha 20 Setembru no sei to’o Malázia iha 21 Setembru 2023 no diretamente parstisipa iha festival to’o loron 26 fulan Setembru.
Festival ne’e rasik sei partisipa hosi nasaun 10 mak hanesan Xina, India, Indonézia, Japaun, Tailándi, Iran Filipina, Srilanka, Singapura no Timor-Leste.
Partisipasaun ne’e hetan suporta hosi Governu Timor Leste ne’ebé lidera hosi Primeiru Ministru (PM), Kay Rala Xanana Gusmão liuliu Ministériu Joventude Desportu Arte no Kultura, Ministériu Komérsiu no Indústria no Sekretáriu Estadu Arte no Kultura no mos patrosinadór sira seluk.
Jornalista Estajiáriu: Lazaro Pereira Quefi