Hatutan.com (25 Setembru 2023), Díli– Komisaun A Parlamentu Nasionál trata asuntu Lejizlasaun no Justisa, foin lalais ne’e, halo fiskalizasaun bá Rejiaun Administrativu Espesiál Oé-Cusse Ambeno (RAEOA) hodi haree besik liu tan servisu sira ne’ebé gasta orsamentu Estadu nian iha Oé-Cusse.

Lee Mós: “Fa’an” Rezidénsia Fulolo, Notariadu RAEAO Konsidera La Prienxe Rekezitu

Uma Estadu ka Rezidénsia Autoridade RAEOA nian iha área Fulolo, aldeia Sanane, Suku Costa, Sub-Rejiaun Pante Makasar, Rejiaun Administrativa Espesiál Oecusse Ambeno (RAEAO). Foto/Lázaro Pereira Quefi

Mezmu seidauk publika rezultadu fiskalizasaun ne’e, Prezidente  Komisaun A PN, Patrocíno Fernandes do Reis, hateten durante fiskalizasaun ne’e komisaun A identifika iha duni selebrasaun kontratu kona-bá fa’an no sosa rezidensia Fuilolo  entre prezidente atuál RAEOA, Arsenío da Paixão Bano ho antigu  prezidente RAEOA atuál Sekretáriu Jerál partidu FRETILI, Marí Alkatiri

Membru PN hosi Bankada CNRT ne’e husu públiku atu akompaña rezultadu fiskalizasaun iha relatóriu Komidaun A ne’ebé sei aprezenta iha Plenária  PN iha tempu badak.

“Ha’u hanoin iha RAEOA akontese  erru barak.  Buat sira-ne’e, ami sei hato’o iha ami nia relatoriu no ita-boot jornalista sira bele haree buat ne’ebé ami ladún kontenti mak tanba prezidente RAEOA desvia uituan  hosi ami nia vizita mais labuat ida tanbá Estadu la depende bá ema ida, sira seluk ne’ebé iha ne’ebá nafatin fó informasaun sira ne’e hotu,” Deputadu Patrocínio  Fernandes dos Reis haktuir bá jornalista sira iha Sala Bankada CNRT-PN, Segunda (25/09/2023).

Entretantu iha fiskalizaun foin lalais ne’e komisaun A la konsege hasoru malu ho Prezidente RAEOA, Arsenío Bano tanba halo hela lisensa annual iha Austrália.

“Ami  bá RAEOA atu haree de’it problema administrasaun públika, laiha buat seluk. Administrasaun públika ita-boot sira hatene katak bainhira ita ko’alia kona-bá administrasaun públika mak  problema birokrasia no  enkuadramentu legál,” Patrocíno  Fernandes dos Reis hateten.

“Ami haree hotu,  ami iha hotu informasaun kona-bá sira ne’e ne’e mak ohin ha’u dehan depois mak imi haree iha relatoriu iha duni selebrasaun kontratu ida entre Prezidente Autoridade RAEOA  ho antigu prezidente autoridade RAOA, mais bá komisaun konsidera ne’e kontratu ne’ebé nulu tanba tuir lei ne’e kodigu sivíl hateten atu halo selebrasaun kontratu liuliu bá propriedade  Estadu nian la’ós propriedade estadu nian maibé propriedade privadu sira mós kona-bá selebrasaun kontratu ida atu validu mak kuandu notáriu mak halo bainhira norariu la halo mak la sertifiká kontratu ida-ne’e mak kontratu ne’e nulu,” Patrocíno hateten.

Molok ne’e,  Kuarta 16 fulan-Agostu 20203, Prezidente Autoridade RAOA, Arsénio da Paixão Bano, konfirma katak investimentu bá rezidénsia Fulolo ne’e osan mai hosi fundu espesiál dezenvolvimentu nian no ema bele sosa tanba Lei mak fó dalan ka regula atu oinsá osan bele tama fila-fali ba Kofre RAEOA nian.

Arsénio Bano hakarak klarifika katak, rezidénsia iha Fulolo ne’e dala-ruma ema barak rona sala informasaun tanba tuir loloos ne’e rezidénsia ne’e investimentu públiku-priváda RAEOA nian.

Iha loron 21 fulan-Agostu 2023, Diretór Konservasaun Notariadu RAEOA, José Ase Neno Colo, hateten bá Hatutan.com katak Serbisu Konservasaun Notariadu Rejiaun Administrativa Espesiál Oecusse Ambeno (RAEOA) seidauk halo kontratu definitivu bá promessa kompra no venda ka “fa’an” uma Estadu iha área Fulolo, aldeia Sanane, Suku Costa, Sub-Rejiaun Pante Makasar entre atuál PA, Arsénio Paixão Bano ho Mari Bim Amude Alkatiri, tanba konsidera la prinxe rekezitus.

Diretór Konservasaun Notariadu RAEOA, José Ase Neno Colo bá Hatutan.com  via telefónika esplika, dokumentu sira ne’ebé Autoridade aprezenta bá parte Notariadu maka karta justifikasaun ka rekomendasaun hosi Diretór Terras no Propriedade Rejionál nian, tau hamutuk ho karta promessa kompra no venda entre parte rua.

Lee Mós: CAC Halo Hela Averiguasaun bá Prosessu “Fa’an” Uma Estadu Fulolo

Jornalista Estájiaria : Zita Menezes