Hatutan.com, (27 Setembru 2023), Díli-Konsellu Ministru sira-nian ne’ebé hala’o iha Palásiu Governu, Díli, Kuarta (27/09/2023), aprova  projetu Dekretu-Lei ne’ebé sai hanesan medida temporáriu ida atu estabiliza ka normaliza presu foos iha merkadu rai-laran.

Lee Mós : Governu Aprova Rezolusaun Reativa Membru PNTL 158

Sorumutuk Konsellu Ministru (KM). Foto/Dok GPM.

Proposta kona-bá projetu Dekretu-Lei ida-ne’e aprezenta hosi Ministru Komérsiu no Indústria (MCI-sigla portugés), Nino Pereira, hafoin semana rua resin, halo negosiasaun ho empreza importadora sira foos nian tanba presu foos sa’e iha merkadu rai-laran.

Konsellu Ministrus aprova projetu Dekretu-Lei ne’ebé aprova medida intervensaun temporáriu bá estabilizasaun presu foos iha merkadu, liuhosi atribuisaun subsídiu pekuniáriu/pecuniary bá empreza importadora sira.

Sita hosi komunikadu imprensa reuniaun Konsellu Ministru sira-nian ne’e karak diploma ida-ne’e determina mós konstituisaun estoke suplementár ida bá seguransa foos, ho tonelada rihun 30, hodi rai iha armazein Sentru Lojístiku Nasionál (CLN, sigla portugés) ne’ebé destina bá intervensaun sosiál iha situasaun emerjénsia, liu-liu inundasaun, katástrofe naturál, motivu sanitáriu sira, solidariedade sosiál no atu fornese ba empreza grosista sira (empreza sira ne’ebé fa’an ho kuantidade boot) karik presiza.

Presu foos importadu ne’ebé fa’an iha armazein empreza importadór sira nian no fa’an fila-fali bá konsumidór sira iha loja sira ne’ebé fa’an foos ho kuantidade uitoan-uitoan ne’ebé ema barak liu maka konsume, estabiliza ho valór 50 sentavu kada kg.

Benefisiáriu sira  hosi medida ida-ne’e, empreza sira ne’ebé fa’an ho kuantidade boot ka operadór ekonómiku sira ne’ebé komprova, liuhosi kópia autentikada husi Autoridade Aduaneira, katak sira importa no simu ona kuantidade foos ho karaterístika ne’ebé define ona iha diploma ne’e, simu valór hamutuk dolar amerikanu 5 kada foos ho 25kg ne’ebé importa ka fa’an.

Implementasaun hosi medida ida-ne’e, ninia objetivu mak atu satisfás nesesidade alimentár populasaun sira nian ho folin ida ne’ebé asesivel liu hodi kompensa empreza importadora sira hosi folin importasaun nian no kria estoke minimum hamutuk foos tonelada rihun 30 ba situasaun emerjénsia.

Períodu vijénsia hosi medida ida-ne’e maka loron 180, hafoin diploma ne’e tama iha vigór, iha loron tuirmai hosi ninia publikasaun.

Rezultadu hosi sorumutuk Konsellu Ministrus ne’e, aprova mós projetu Rezolusaun Governu kona-bá nesesidade vijilánsia no prezervasaun bá sistema abastesimentu bee nian. Nune’e, Ministériu Obras Públikas no Bee Timor-Leste kontinua tau prioridade hodi rezolve problema abastesimentu nian ho lais, ho avaliasaun no reabilitasaun bá infraestrutura sira kanalizasaun nian ne’ebé eziste, nune’e mós nia eventuál rekonstrusaun, hodi garante fornesimentu bee ne’ebé adekuadu ba populasaun.

Autoridade públika kompetente sira mós iha responsabilidade hodi koordena inisiativa sira sensibilizasaun nian kona-bá importánsia husi poupa no uzu responsavel bá bee no infraestrutura kanalizasaun nian.

Konsellu Ministrus sira-nian aprova planu intervensaun ho karater urjente, ne’ebé aprezenta hosi Ministru Obras Públikas, Samuel Marçal, hodi reabilita no rekonstrui ho urjénsia infraestrutura ne’ebé afeta hosi kalamidade ne’ebé akontese iha munisípiu ualu hosi loron 2 to’o 7 fulan-jullu tinan 2023.

Konsellu Ministrus, tuir projetu ne’ebé aprezenta hosi Ministru Justisa, Amândio de Sá Benevides, delibera ona hodi fó rai ida iha zona Caicoli, hodi harii instalasaun foun bá Eskola Portugeza Dili.

Ikus liu, Konsellu Ministrus delibera ona hodi aprova prosedimentu ajusta diretu ida ne’ebé urjente ho empreza Thales DIS Singapore PTE LTD, hodi fornese unidade kaderneta Pasaporte hamutuk 73,150.

Jornalista: Rogério Pereira Cárceres