Hautan.com, (28 Setembru 2023), Díli-Membru Bankada FRETILIN iha Parlamentu Nasionál (PN), Antoninho Bianco, prefere atu figura ida ne’ebé ideal liu bá sai komisáriu Komisaun Anti Korrupsaun (CAC, sigla portugés) mak ida ne’ebé la’ós asegura interese partidu polítiku (ParPol) nian, maibé servisu ho onestu bá asegura interese Estadu hodi prevene no kombate korrupsaun iha Timor-Leste.

Lee Mós: PN Seidauk Bele Hili Komisáriu CAC

Dokumentu Survey CAC. Foto/Repro

Deputadu Antoninho Bianco  afirma   figura ideal liu bá instituisaun Estadu, hanesan CAC tenke hala’o servisu interese Estadu nian, nune’e bele asegura imajen no integridade CAC nian atu kombaté korrupsaun no prevene korrupsaun.

“Hosi naran rua ne’ebé Governu propoin mai PN mak Sergio  de Jesus Fernandes da Costa Hornai ho Rui Pereira dos Santos, klaru ami hili ida de’it ho konsensu. Se la muda lei, ami  buka konsensu ida para hetan ema ne’ebé di’ak liu depois para hala’o servisu la’ós bá partidu maibé hala’o servisu bá defende lialoos,” Duputadu Antoninho Bianco bá jornalista iha PN, Kuarta (27/09/2023)

Antoninho Bianco konsidera prosesu bá eleisaun komisáriu CAC iha PN la’o di’ak no bankada CNRT pronúnsia ona data eleisaun,  bá kandidatu sira ne’ebé aprezenta hosi IX Governu  depois haree took figura kandidatu na’in-rua ne’ebé mak aprezenta hosi  Governu

Nia hateten, figura ida ne’ebé bá iha laran ne’e sira presiza hala’o servisu defende lialoos, baze mak  lei entaun lei mak orienta komisáriu no nia adjuntu sira atu aban bainrua hala’o servisu.

“Ha’u hanoin ami labele hatete buat ne’ebé ami fó hanoin bá malu  depois rezultadu mak imi haree took ne’ebé prosesu la’o hela depois mak ami tetu hamutuk para atu buka figura ida ne’ebé  konsensuál para figura ne’e bá  bele halo servisu interese Estadu nian no bele asegura CAC para bele kombaté korrupsaun no prevene korrupsaun,” Antoninho Bianco  tenik.

CAC nia objetivu prinsipál mak kombaté korrupsaun no prevene korrupsaun, tanba ne’e, Deputadu Antoninho Bianco hatutan, tenke ema ne’ebé iha duni dignidade no bele dehan la’ós hanesan Maromak maibé nia bele halo buat ruma  di’ak liu.

“Ami fretilin durante ne’e halo kolaborasaun ami nia ne’e ema seluk seidauk bele halo hanesan ami halo ne’e ne’ebé ami halo tiha ona la’o to’o iha ne’e husu ami nia hanoin ami fó hanoin ne’ebé ami halo ami nia kontribuisaun, ema dehan oposizaun konstrutivu, edukativu no laiha muturabu nia laran,” nia tenik.

Jornalista Estajiária: Zita Menezes