Hatutan.com, (28 Setembru 2023), Díli—Komandu Polísia Nasionál Timor-Leste (PNTL) aseita ona ho desizaun Governu nian hodi reativa membru reformadu na’in-158, atu bele hala’o fali funsaun polisiál.

Komandante Jerál foun Polísia Nasionál Timor Leste (PNTL), Komissáriu Polísia Henrique da Costa ho Segundu Komandante Pedro Belo simu pose ba mandatu tinan tolu, iha Kuartél Unidade Espesiál Polísia (UEP), Bairru-Pité, Díli, Segunda (27/03/2023). Foto/Elio dos Santos da Costa.

Segundu Komandante Jerál, Komissáriu Polísia Pedro Belo fó razaun, katak, aseitasaun ida-ne’e bazeia sorumutu Konsellu Ministru nian ne’ebé hala’o iha Kuarta (27/09), aprova tiha ona projetu rezolusaun Governu nian, hodi reativa polisia reformadu na’in 158.

Lee Mós: Governu “Ameasa” Ezonera Komandante Jerál PNTL Bainhira La Kumpre Polítika Reativasaun Membru Reformadu 158

“Komandu PNTL prontu kumpre desizaun ne’e atu implementa. Ami aseita ona desizaun ne’ebé Konsellu Ministru aprova ona atu reativa polisia reformadu na’in 158. Tanba ne’e, saida mak hakerek ona iha rezolusaun ne’e, hatun mai ami ezekuta la’os atu kontra fali,” Pedro Belo hateten iha Akademia PNTL, Comoro-Dili, Kinta (28/09).

Segundu Komandante PNTL ne’e konsidera projetu rezolusaun ne’ebé Governu aprova ona iha Konsellu Ministru ne’e mak desizaun legál ona, tanba ne’e hein de’it publikasaun iha Jornál Repúblika nian, komandu PNTL ezekuta órden no la’os atu kontra fali desizaun ne’e.

Iha biban hanesan, Ministru Interiór (MI), Francisco da Costa Guterres fó razaun katak, desizaun Governu nian hodi reativa polisia reformadu na’in 158, atu bele kria kondisaun bá sira, molok sira fila bá vida sivíl hamutuk ho komunidade.

Bainhira sira fila bá komunidade mós sira nafatin iha ligasaun ho instituisaun PNTL, atu halo servisu ruma kontribui bá hametin estabilidade iha komunidade nia leet.

Jornalista: Rogério Pereira Cárceres