Hatutan.com, (02 Outubru 2023), Díli—Governu India iha kompromisu boot hakarak apoiu totál adezaun Timor-Leste (TL) ba organizasaun rejionál Association of Southeast Asian Nation (ASEAN).

Primeiru-Ministru (PM), Kay Rala Xanana Gusmão simu audiénsia hosi Ministru Estadu Relasaun Esteriór Repúblika Índia, Rajkumar Ranjan Singh iha Palásiu Governu, Segunda (02/10/2023). Foto: MPM.

Kompromisu ne’e India sei halo liu hosi ninia despozisaun tomak atu apoia TL iha área oi-oin hanesan, agrikultura, Rekursu Umanu no akompaña to’o tama ASEAN.

Lee Mós: Espesialista Rekursu Umanu ASEAN Konkorda ho Pozisaun TL, Ezije Restaurasaun Demokrasia Myanmar

“Ida-ne’e aponta hotu ona no sei ko’alia ho embaixadór Índia iha Timor Leste, Ministériu ne’ebé presiza sei liuhosi MNEC mak komunika ho Embaixadór. Governu índia mós hakarak fó treinamentu ba Timor oan sira, inklui ajuda Timor Leste prepara aan tama ASEAN,”  Primeiru-Ministru (PM), Kay Rala Xanana Gusmão hateten hafoin simu audiénsia hosi Ministru Estadu Relasaun Esteriór Repúblika Índia, Rajkumar Ranjan Singh iha Palásiu Governu, Segunda (02/10/2023).

Xefe Governu hatutan, India iha Timor Leste nia kotuk tanba India mós hakarak partisipa iha dezenvolvimentu Timor Leste nian.

“India hakarak apoiu Timor Leste iha area hotu-hotu, ne’e sei hein kontaktu hosi Governu India,” nia subliña.

Iha fatin hanesan, Ministru Estadu Relações Exteriór Repúblika Índia, Rajkumar Ranjan Singh fó apresiasaun bá Primeiru-Ministru, Kay Rala Xanana Gusmão ne’ebé hanesan Xefe Governu ba povu Timor Leste.

Primeiru-Ministru (PM), Kay Rala Xanana Gusmão simu audiénsia hosi Ministru Estadu Relasaun Esteriór Repúblika Índia, Rajkumar Ranjan Singh iha Palásiu Governu, Segunda (02/10/2023). Foto: MPM.

Iha sorumutu ne’e, Rajkumar Ranjan Singh husu ba Xefe Governu atu oferese fatin ba konstrusaun edifísiu embaixada Índia nian iha Timor-Leste, hanesan saida mak Primeiru-Ministru India nian anunsia ona iha konferénsia nível altu ASEAN bainhira hasoru malu ho Xefe Governu Timor Leste iha Jakarta.

“Ami hein katak ho ami nia Embaixada foun ne’ebé sei instala iha Timor-Leste, bele halo servisu ida besik liu povu ba povu atu tulun Timor-Leste iha área edukasaun, peskiza, petrokimiku, petroleum no explorasaun bazeia experiénsia ne’ebé Índia iha,” nia hateten.

India hein katak ho servisu no kooperasaun sira ne’ebé Governu Índia sei oferese bele tulun dezenvolvimentu iha Timor-Leste ho maneira ne’ebé dignu atu servi povu di’ak liu tán.

“Índia mós kongratula esforsu sira Timor-Leste nian atu bele hola parte iha organizasaun rejionál ASEAN nian, hanesan membru bá dala-XI no Índia iha mós kompromisu atu empodera Timoroan sira bele iha abilidade no matenek atu bele iha kolaborasaun di’ak ho nasaun sira membru ASEAN nian, hodi partisipa ativu iha prosesu dezenvolvimentu sira iha sudeste Aziátiku,” Rajkumar Ranjan Singh hateten.

Jornalista: Vito Salvadór