Hatutan.com, (05 Outubru 2023), Díli-Ministériu Defeza hamutuk ho Komandu FALINTIL-Forsa Defeza Timor-Leste (F-FDTL), Kinta (05/10/2023), anunsia ka loke ona bá públiku, kona-bá rekrutamentu membru foun iha rejime espesiál bá ema na’in- 87.

Lee Mós: F-FDTL Tenke Hamutuk ho Povu iha Kualkér Tempu

Konférensia imprensa hodi anúnsia bá públiku kona-bá rekerutamentu F-FDTL foin na’in-87, Kinta (05/10/2023). Foto/Rogério Pereira Cárceres

Diretór Jerál Ministériu Defeza no primeiru koordenadór bá komisaun rekrutamentu, Nuno Carvalho Santos, esplika komisaun organizadora bá rekrutamentu membru foun F-FDTL nian, iha rejime espesiál bá tinan ne’e, ho baze bá despaxu hosi Ministru Defeza (MD), Donanciano da Costa Gomes “Klamar Fuik”, ne’ebé mak nu’udár prezidente bá komisaun, no Xefe estadu Maiór Jenerál F-FDTL, Tenente Jenerál Domingos Raúl “Falur Rate Laek”, iha loron 02 fulan-Outubru 2023, orienta hodi harii komisaun organizadora rekrutamentu bá 2023 nian.

Bá iha kandidatu ka interesadu sira ne’ebé maka hakarak tama iha fileira Forsa Armadas nian, fó sai bá públiku, atu nune’e, públiku bele akompaña, no mós bele halo tuir rekizitu sira no lala’ok rekrutamentu bá 2023 nian.

“Rekrutamentu iha tinan ida ne’e, ami sei loke vaga hamutuk 87, liu-liu bá nivel edukasaun S1 no S2, no mós ami la taka dalan bá nivel sira seluk, aas liu, para atu sé mak interese, hakarak tama iha fillera forsas armadas, komesa ohin,  Kinta 05 fulan-Uutubru to’o loron 20 fulan-Outubru 2023, ami  loke bá públiku, bá kandidatu sira ne’ebé mak hakarak konkorre,” diretór jerál Ministériu Defeza, Nuno Nuno Carvalho Santos, informa bá jornalista sira liuhosi konferénsia, iha Auditóriu Kuartél Jenerál F-FDTL, Fatuhada-Díli.

Rekrutamentu ida ne’e, komisaun sei uza sistema online. Bá kandidatu sira ne’ebé maka interesse hakarak aplika iha biban ida ne’e, komisaun rekrutamentu sei fornese website htts://rekrutamentu.f-fdtl.tl.

Kona-bá rekizitu nian, aplikantes sira bele asesu iha fatin tolu ne’ebé mak komisaun rekrutamentu deside ona mak hanesan iha Sede Suku Becora no Comoro, inklui Kuartél Jenerál F-FDTL nian rasik, no mós bele liuhosi sítiu online htts://rekrutamentu.f-fdtl.tl,” nia esplika.

Dokumentu komprovativu sira ne’ebé maka komisaun presiza, hanesan sertifikadu eskola nian, no CV (curriculum vitae) sira. Dokumentu hotu ne’ebé aplikante sira atu hatama, tenke ho modelu PDF, atu nune’e bele iha garantia.

Prosesu rekrutamentu bá membru foun sira F-FDTL nian ne’e, sei hala’o liuhosi faze haat, mak hanesan, ida, sei halo verifikasaun dokumentu, rua, teste saúde, tolu, teste fíziku, haat, halo entrevista ka psiko-teste.

Komisaun rekrutamentu, sei elimina kandidatu kada faze. Katak, kandidatu sira sei elimina automatikamente bainhira lakon iha faze haat ne’ebé maka temi tiha ona.

Jornalista: Rogério Pereira Cárceres