Hatutan.com, (12 Outubru 2023), Díli—Vise-Ministru Saúde bá Fortalesimentu Institusionál Saúde, José dos Reis Magno seidauk hatene no seidauk hetan informasaun kona-bá kama dentaria aat iha Hospitál Nasionál Guido Valadares (HNGV).

Vise Ministru Saude José dos Reis Magno. Foto: Tome da Silva.

“Ha’u seidauk rona. Ha’u foin hatene hosi itaboot. Obrigada tanba ita bele informa bá ha’u dehan kama ka mákina dentaria ne’e avaria,” José dos Reis Magno hateten bá Hatutan.com hafoin hala’o lansamentu bá moras la hada’et iha sede suku Comoro, Kinta (12/10/23).

Lee Mós: Problema Sériu Iha Ministériu Saúde, Lian Hosi Médiku Espesialista Ne’ebé Lian Laek

Tanba ne’e, Governant ene’e sei husu tuir assuntu ne’e bá Diretora Ezekutiva HNGV, atu haree kona-bá kondizaun kama ka mákina ne’e.

“Ita haree took, mais ha’u hakarak hateten bá ita boot sira katak, kama no mákina dentaria sira ne’e mesak karun de’it, ne’ebé la’ós atu husik de’it buat karun sira ne’e,” Vise-Ministru Saúde esklarese.

Tuir nia, iha semana ne’e nia laran sei hala’o enkontru ho responsável HNGV atu bele haree direta situasaun ne’ebé akontese iha ospitál ne’e, nune’e buat hotu bele funsiona hikas ho di’ak no labele prezudika pasiente sira.

Jornalista Estajiária: Zita Menezes