Hatutan.com (18 Outubru 2023), Díli—Comissão Anti Corrupção (CAC) kontinua halo averiguasaun bá prossesu “fa’an” Rezidénsia Estadu iha área Fulolo, aldeia Sanane, Suku Costa, Sub Rejiaun Pante Macasar, Rejiaun Administrativa Espesiál Oecusse Ambeno (RAEOA) hosi atuál Prezidente RAEOA, Arsénio Paixão Bano bá eis Prezidente RAEOA Mari Bim Amude Alkatiri.

Diretór Investigasaun CAC, José Verdiál.

Diretór Investigasaun CAC, José de Araújo Verdiál informa, ekipa investigadór CAC nian kontinua halo prossesu averiguasaun no seidauk to’o iha konkluzaun.

Lee Mós: Arsénio Bano “Fa’an” Uma Estadu iha Fulolo bá Alkatiri

“Ba kazu ne’e sei iha prossesu averiguasaun. Signifika, hosi investigadór sira sei halibur hela dadus no dokumentu sira relasiona ho prossesu ida-ne’e. Bainhira dokumentu sira kompeletu ona mak sei analiza hodi halo konkluzaun. Karik iha indisius krimi ruma maka ita haruka bá Ministériu Públiku,” José de Araújo Verdiál hateten bá Hatutan.com iha knaar fatin, Faról, Kuarta (18/10/2023).

Diretór Investigasaun ne’e hatutan, bainhira foin ko’alia kona-bá indisius, entaun la’ós rona de’it depois halo ona konkluzaun tanba Lei bandu atu kriminaliza ema sem faktus, tanba ne’e maka tenke liu hosi prossesu.

Tanba ne’e, epkipa investigadór sira sei mobiliza an no servisu makás atu halibur dadus hotu-hotu tanba baibain tama ona bá prossesu averiguasaun ne’e kontinua la’o to’o hotu.

“Prossesu ne’e atu bainhira mak hotu, depende de’it bá servisu tanba dadus ne’e sei foti halo kompletu mak bele halo investigasaun ida kle’an no loos,” nia subliña.

Oras ne’e daudaun, ekipa investigadór sira halibur hela informasaun hosi informadór sira no koko mós halibur dokumentu balun liga ho ninia regra sira no Lei sira ne’ebé mak relasiona ho Terras no Prioriedade nian.

Jornalista Estajiáriu: Lazaro Pereira Quefi