Hatutan.com, (23 Outubru 2023), Díli-Governu Austrália liuhosi Programa Dezenvolvimentu Polísia Timor-Leste (TLPDP-sigla Ingles),  Segunda (23/10/2023), entrega  mákina (robot) ne’ebé bele harahun materiál esplozivu bá Polísia Nasionál Timor-Leste (PNTL).

Lee Mós: Membru PNTL Reformadu Na’in-158 Hahú Hikas Serbisu no Simu Uluk Saláriu Fulan Tolu

Mákina harahun materiál espluzivu. Foto/Tome da Silva

Mákina ka robot ne’e atu fasilita Unidade Espesiál Polísia (UEP)  liuliu ekipa Explosive Ordinance Disposal (EOD) atu  bele harahun bomba ka materiál esplozivu ruma ne’ebé atu fó risku bá ema nia vida.

“Mákina ne’ebé oferese, ami fiar metin no ho manurabilidade di’ak tebes. Fundasaun primáriu bá mákina ne’e, iha hasa’e tékniku iha sira nian seguransa. Ida ne’e ita bele uza atu identifika no halakon arma tiru, fugetes, instrumentu implosive, no sasan seluk perigu,” Adjuntu Embaixadóra Austrália nian mai Timor-Leste, Caitlen William, hateten molok entrega mákina ne’e bá Komandu PNTL iha Kuartel UEP, Bairro Pite, Díli.

Mákina ne’e bele utiluza bá hala’o monitorizasaun, deskobrimentu no investigasaun bá objetu sira mak iha kondisaun ne’ebé perigu tebes. Mákina ne’e mós iha rasik ninia kámera robótiku hamutuk lima iha ninia lolon, sensor sira no sistema komunikasaun, hodi servisu hamutuk, atu fornese solusaun komprensivu.

Sistema ida-ne’e, servisu hamutuk ona ho Militár no Polisia sira iha nasaun 40 iha mundu, no país parseiru ASEAN sira.

Komandante jerál PNTL, Komisáriu jerál Polisia Henrique da Costa, hateten ne’e onradu no prestíjiu ida bá PNTL  tanba hetan prezensa hosi Ministru Interior, Francisco Guterres no Adjuntu Embaixadór Austrália mai Timor-Leste, Caitlen William, iha seremónia entrega robot EOD, hosi Governu Australia bá PNTL.

Komisáriu Henrique da Costa, konsidera Ministru Francisco Guterres ninia prezensa iha komandu UEP, atu fó korájen liután bá sira, bá dezafiu sira ne’ebé sei mai. Nune’e mós ho Prezidente Komisaun B, Augosto ‘Deker’ atu nafatin tau matan bá instituisaun PNTL iha ninia progresu servisu sira.

Adjuntu Embaixadór Austrália nia prezensa mós sai hanesan kompromisu  ida hosi Governu Austrália ninian, hodi nafatin apoiu bá iha PNTL.

“Ohin loron, marka tán istória ida iha PNTL, sai PNTL ida  modernu, liuhosi ekipamentu, ho teknolójia modernu ne’ebé oferese hosi Governu Austrália, robot EOD, hanesan mós ekipamentu ida ne’ebé importante iha misaun EOD PNTL lorloron ninian,” Komandante Henrique subliña.

Bainhira hasoru situasaun ida ne’ebé risku tebes, ho sistemta remot control, hodi bele hamenus risku bá ekipa EOD-PNTL nia atuasaun, bainhira hala’o hela dezativasaun bá bomba sira, iha aparellu sira seluk ne’ebé mak PNTL deskonfia.

Komandante jerál PNTL ne’e fiar metin katak, prezensa robot ida ne’e, EOD-PNTL bele ona utiliza hodi bele hala’o ninia misaun sira hanesan investigasaun, identifikasaun, mobilizasaun no destroisaun bá objetu sira ne’ebé deskonfia, hodi fó ameasa bá vida umana, no propriedade sira.

Lider másimu iha komandu PNTL ne’e enkoraza ninia membru sira ne’ebé mak atu partisipa iha treinamentu bá utilizasaun robot ida ne’e, hahú ohin bá oin, sira-hotu tenke iha kompromisu hodi dedika sira-nian aan, no tenta atu buka hatene, siénsia sira ne’ebé relasiona ho materia ne’ebé importante tebes, hodi asegura komunidade sira.

Iha biban ne’e, Ministru Interior (MI), Francisco Guterres, agradese tebes bá iha Governu Austrália, ne’ebé liuhosi TLPDP, oferese robot no mós atu fasilita formasaun, kona-bá uza robot ne’e.

Ida-ne’e, tuir Francisco Guterres hatudu katak, oinsá PNTL dezenvolve ninia kooperasaun ho nasaun oioin, nasaun amigu sira, no nasaun sira ne’ebé hakarak ajuda Timor-Leste, liu-liu PNTL, hodi hala’o ninia servisu ho di’ak, atu servi nasaun ho povu ida ne’e.

Jornalista: Rogério Pereira Cárceres