Hatutan.com, (24 Outubru 2023), Díli—Komisaun rekrutamentu bá membru foun FALINTIL Forsa Defeza Timor-Leste (F-FDTL), rejísta Timoroan feto no mane na’in 2.530 mak submete ona dokumentus iha sistema, hodi konkorre iha vaga 87 ne’ebé komandu loke bá rejíme espesiál.

Komisaun rekrutamentu bá membru foun rejime Espesiál FALINTIL Forsa Defeza Timor-Leste (F-FDTL) fó-sai totál aplikante ne’ebé submeter ona dokumentus, iha Kuartél Jenerál F-FDTL, Fatuhada, Díli, Tersa (24/10/2023). Foto: Elio dos Santos da Costa.

Hosi totál aplikante ne’e, mai hosi munisipiu Aileu 96, Ainaro 133, Baucau 396, Bobonaro 179, Covalima 90, Dili 626, Ermera 204, Lautem 221, Likisa 104, Manatuto 91, Manufahi 103, Viqueque 204, Rejiaun Administrativa Espesiál Oecusse (RAEOA) 83.

Lee Mós: Ministériu Defeza ho F-FDTL Loke Rekrutamentu iha Rejime Espesiál bá Ema Na’in-87

Hosi númeru ne’e, eskola ho nível doutoramentu laiha, Mestradu 68, Lisensiatura 1.883 no Baxarelatu 197.

Diretór Jerál Ministériu Defeza no primeiru koordenadór bá komisaun rekrutamentu, Nuno Carvalho Santos informa, progresu rekrutamentu ne’e katak, agora daudaun, sira tama ona iha faze, rekolla dokumentu sira, fasilita formuláriu via-online, hosi kedan 05 to’o 20 Outubru 2023.

Ohin 24 Outubru, komisaun rekrutamentu halo avaliasaun katak, iha dadus, dokumentu hirak ne’ebé mak simu liuhosi online, simu ho di’ak no dokumentu sira ne’e tama hotu ona iha sistema, no oras-ne’e dadaun komisaun atu halo bá faze pré-kualifikasaun nian.

“Pre-kualifikasaun ida-ne’e, komisaun sei haree dokumentu sira ne’ebé mak agora daudaun tama. Ezemplu, iha dadus ne’ebé mak aplika iha sistema online hamutuk 2.530, mane 2.117 no feto 413,” Nuno Carvalho Santos deklara liuhosi konferénsia imprénsa iha Kuartél Jenerál F-FDTL, Fatuhada, Díli, Tersa (24/10/2023).

Totál hosi aplikantes sira ne’e, komesa ohin to’o semana ida ne’e Komisaun sei halo filtrájen bá dokumentu sira ne’ebé mak aplikante sira submete mai iha komisaun, liuhosi sistema online ne’ebé mak publika ona.

Hahú kedan bainhira vaga ne’e publika, komisaun rekrutamentu simu mós mensájen oioin hosi pessoál no individu sira balun, ne’ebé husu atu halo ‘de’it rekomendasaun’. Maibé, Nuno Carvalho Santos afirma katak, sira sei hala’o servisu tuir de’it regra ne’ebé mak iha no laiha tratamentu espesiál bá ema ruma.

“Ami servisu tuir de’it regra ne’ebé maka iha no sei la simu hosi sistema ida hanesan uluk. Ita evita buat ida rekomendasoens, evita buat ida ema bolu dehan inan-sarani, aman-rasani iha laran. Ami hakarak aplika ida ne’e bá oin, kontinua ida-ne’e, mantein nafatin, felizmente to’o agora dadaun, ami seidauk iha keixas bá ida-ne’e. Buat hotu-hotu, prosesu ne’e la’o di’ak hela, ami sei kontinua ho kredibilidade no kualidade ida ne’ebé maka iha,” Nuno Carvalho Santos, afirma.

Iha fatin hanesan, responsável Tékniku Komandu F-FDTL nian, Majór Hélio da Costa esplika, prossesu rekrutamentu espesiál ida-ne’e, iha faze haat, inklui ho pre-selesaun.

Iha pre-selesaun ne’e maka, komisaun sei verifika de’it bazeia bá kritéria. Haree bá sira nia idade, dokumentu komprovativu sira-nian, sira nia inan-aman nian ho sira ninian Curriculum Vitae.

“Sé dokumentu sira ne’e mak laiha, sira automátikamente ne’e ami sei elimina. Ho sira nia tinan, idade ne’e. Entaun, hosi pre-selesaun ne’e, oras ida sei bá fila-fali nia na’in, bá iha sira-nian konta. Iha dia 06 novembru, ami sei publika sé mak pasa iha pre-selasaun,” Majór Hélio informa.

Hafoin pre-selasaun, komisaun rekrutamentu sei kontinua kedan bá iha faze ida kona-bá abilitasaun literária nian.

Tanba prosesu rekrutamentu ida ne’e, komisaun bazeia bá mértiu. Iha abilitasaun literária ne’e oras ida sei tulun hosi panelista sira mak sei hili ida ne’ebé kualifikadu iha área espesialidade, tuir nesesidade komandu F-FDTL nian.

“Entaun, abilitasaun literária ne’e nia pézu ne’e 30%. Iha dia 15 novembru, informasaun sira ne’e sei sai, sé mak pasa iha ne’e, kada faze, ami sei elimina ema to’o iha faze ikus liu maka entrevista,” nia esplika.

Tuir oráriu hosi komisaun rekrutamentu, katak, teste saúde nian bá kandidatu sira sei hahú iha 17 novembru, teste fíziku iha 20 novembru no teste ikus liu mak entrevista iha loron 27 novembru 2023.

Jornalista: Rogério Pereira Cárceres