Hatutan.com, (13 Favereiru 2024), Manatuto-Komunidade sira iha Suku Aubeon, Postu Administrativu Barique/Natarbora, Munisípiu Manatuto, prontu oferese sira-nia rai bá Governu liuhosi Ministériu Petróleu no Rekursus Minerais (MPRM) atu harii sentru dezenvolvimentu integradu bá petrólu nian.

Lee Mós: Refinaria no Instalasaun Petrokímiku Muda bá Natarbora Atu Hadi’a Efisiénsia Operasionál no Hamenus Impaktu Ambientál

MPRM halo sosializasaun programa IX Governu Konstitusionál nian kona-bá dezenvolvimentu projetu tasi-mane iha Salaun Parokial Parókia Natarbora, Tersa (13/02/2024). Foto/Rogério Pereira Cárceres

Xefe Suku Aubeon, Domingos Gonzaga, hateten sira-nia parte agradese tebes bá IX Governu Konstitusionál ne’ebé lidera hosi Primeiru-Ministru (PM), Xanana Gusmão hodi eskolla Natarbora sai hanesan fatin ida ne’ebé atu bele implementa programa ka projetu tasi-mane  nian.

“Hanesan autodidade lokál, lideransa komunitária, reprezentante komunidade Aubeo, atu dehan de’it katak, prontu simu, prontu koopera ho IX Governu. Uluk kedas, kuandu iha 2019, maun-boot Xanana mai, nia to’o iha tasi Aubeon ne’e, ita nakloke. Dehan katak, Natarbora tetuk ne’e, maun-boot nian no  ita prontu koopera,” Xefe Suku Aubeon, Domingos Gonzaga, iha ámbitu atividade sosializasaun bá programa IX Governu Konstitusionál nian kona-bá dezenvolvimentu projetu tasi-mane iha Salaun Parokial Parókia Natarbora, Tersa (13/02/2024).

Nia fó sasin katak ema hotu mós hatene ho klaru tebes katak, bainhira haree iha mapeamentu jeográfiku  nian, ne’ebé maka atu implementa projetu ida ne’e, komunidade Aubeon mak afetadu maka’as. Maibé, Governu iha programa, iha hanoin di’ak ida sé aban bainrua mak komunidade Aubeon mak afeta tebes bá projetu ida ne’e, governu sei la taka matan bá komunidade ida-ne’e.

“Ita la husu buat barak, importante mak ne’e, Governu tau hanoin atu halo di’ak bá povu Timor, no bá komunidade sira ne’ebé mak afeta bá projetu ida ne’e, ha’u hanoin, Governu sei la taka matan bá komunidade Aubeon, tanba ne’e mak ita prontu koopera, prontu atu koalia bá parte hothotu para apoiu desizaun Governu ninian,” Xefe Suku Domingos Gonzaga hateten.

Iha abertura sosializasaun ne’e, Prezidente Autoridade Munisípiu Manatuto, Luis Maria Fernandes, hato’o nia agradesementu bainhira sira rona katak, projetu ida-ne’e, sai projetu investimentu estratéjiku ne’ebé maka dadaun ne’e timoroan hotu hatene projetu tasi-mane.

Nia husu povu Manatuto atu la bele ho intensaun halo impedimentu. Povu ho autoridade no Governu sentrál hamutuk atu kontribui bá programa Governu nian kona-bá projetu tasi-mane hodi kontribui bá nasaun nia progresu no povu Timor tomak nia moris di’ak.

Jornalista: Rogério Pereira Cárceres