Hatutan.com (13 Novembru 2023), Díli—Komunidade iha Suku Bidau Akadiru-hun, postu administrativu Na’in-Feto, Munisipiu Dili, rekomenda bá Xefe Suku Eleitu atu bele hamosu ka kria programa barak liu tán bá joven sira iha suku ne’e, nune’e bele redús konflitu ka problema sosiál iha suku laran.

Prossesu eleisaun suku segunda volta iha Suku Bidau Akadiru-Hun, Segunda (13/11/23). Foto: Zita Menenzes.

“Maioria komunidade hakarak mudansa ne’e. Tanba lideransa ida ukun iha tempu barak laiha mudansa entaun ne’e ladún di’ak. Ami rekomenda bá Xefes uku eleitu atu organiza joventude halo atividade sosiál desportu no organiza malu iha kooperativa iha suku nune’e atividade iha suku ida nian laran ne’e labele mate,” Komunidade João Paulo hateten bá Hatutan.com hafoin partisipa iha eleisaun segunda volta iha Suku Bidau Akadiru-Hun, Segunda (13/11/23).

Lee Mós: Alexandrinho Braz ho Calistro Pereira Kompete Eleisaun Suku Segunda Volta iha Bidau Santa-Ana

João Paulo  mós observa katak, iha eleisaun seguda volta ne’e prosesu di’ak liu kompara ho primeira volta tanba iha eleisaun ida ne’e fásil tebes.

Nia dehan, eleisaun primeira volta iha loron 28 fulan Outubru ne’e fallansu barak tanba númeru voletin votus ne’e menus depois komunidade la’ós fó votu de’it bá xefe suku maibé mós bá xefe aldeia no delegadu sira.

“Segunda volta iha suku Akadiru-Hun ne’e tuir ami nia observasaun buat hotu la’o di’ak no kapaas tebes,” nia observa.

Suku Bidau Akadiru-Hun iha kandidatu Xefe Suku na’in rua mak kompete iha eleisaun segunda ronde maka hanesan Júlio da Costa Moreira ne’ebé iha primeira ronde hetan votus 57 no mós Juvenál da Conceição ne’ebé iha primeira ronde hetan votus 265.

Jornalista Estajiária: Zita Menezes