Hatutan.com, (15 Novembru 2023), Bobonaro—Polísia Nasionál Timor-Leste (PNTL) liuhosi Komandu Munisipiu Bobonaro identifika ona suspeitu hamutuk na’in-15, deskonfia nu’udár autór bá konfrontu entre komunidade Suku Lourba no Karabau, iha Sesta (03/11/2023).

Membru FALINTIL Forsa Defeza Timor Leste (F-FDTL) ho Polísia Nasionál Timor Leste (PNTL) hakalma no halo mediasaun bá joven sira iha Suku Lourba no Karabau munisípiu Bobonaro, hafoin akontese konfrontu durante finadu Novembru 2023. Foto: Facebook.

“Autór sira ita identifika hotu ona kuaze na’in 15. Ne’e la inklui sira ne’ebé kanek no kuandu konfirma sira nia saúde rekopera ona, entaun ita sei halo identifikasaun,” Komandante PNTL Munisipiu Bobonaro, Superintendente Xefe Polisia António de Sá Benevídes informa, hafoin partisipa serimónia inaugurasaun “Monumentu Liberdade” iha Suku Balibo Vila, Kuarta (15/11/2023).

Lee Mós: Konfrontu iha Lourba, Na’in-Hitu Kanek no Sunu Uma Haat

Komandante António de Sá Benevídes hatutan, suspeitu hirak ne’ebé identifikadu, sira ninia identidade aprezenta hotu ona bá Ministériu Públiku (MP) no hein de’it delegasaun kompeténsia atu ezekuta mandadu kapturasaun, PNTL prontu no kontinua bolu suspeitu sira hodi submete bá prosesu investigasaun kriminál.

“Ita aprezenta ona bá iha Ministériu Públiku no hein delegasaun kompeténsia, mandadu kapturasaun, atu kaptura sira hodi submete bá prosesu,” nia tenik.

Oras ne’e daudaun situasaun iha Lourba ho Karabau la’o ho kontroladu tanba forsa rua (PNTL ho F-FDTL), destakadu ho misaun asegura komunidade sira, liu-liu inan-aman, ferik-katuas, inklui labarik ki’ik-oan sira.

Forsa rua ne’e mós hamutuk ho autoridade komunitáriu sira, xefe aldeia no suku, sira ajuda hadi’a fila-fali vítima sira ne’ebé mak nia uma foin lalais hetan sunu.

Jornalista: Rogério Pereira Cárceres