Hatutan.com, (16 Novembru 2023), Díli–Ministeriu Komersiu  no Industria (MCI, sigla portugés), Kinta (16/11/2023),  ofisiálmente lansa MCI  award 2023 hodi apoiu  micro,  pequena, media empresas (MPME).

Lee Mós: Inaugura iha 2012, Funsionamentu Merkadu Fronteira Batugade Laiha Serteza

Ministru MCI, Filipus Nino Pereira ho Vise-MCI Augostu Junior Trindade lansa MCI Award 2023, Kinta (16/11/2023). Foto/Leopoldina de Carvalho

Prémiu ka Award MCI ne’e  bazeia bá dekretu-lei númeru 27 /2023, loron 14 fulan-Setembru, nu’udár motivasaun bá progressu no kresimentu  setór micro, media no pequena empreza  nu’udár xave bá dezenvolvimentu ekonomiku no moris dignu bá komunidade nian.

“Ita hamosu premiu MCI award  atu enkoraja mikro, pequena, media empreza sira nia tividade negosiu ho diak liu,” Vise-Ministru MCI,  Agusto Junior Trindade haktuir bá jornalista sira iha ámbitu lansamentu MCI Award 2023.

MCI hamosu Award  MCI ne’e tanba haree mós bá situasaun difisil ne’ebé antes ne’e akontese ona, mikro, pequena, media empreza sira-nia ezistensia sai salva guarda bá ekonomia rai-laran.

Papel mikro, pequena no media empreza importante tanba bele kontribui bá kresimentu ekonomia nasaun nian, kria kampu servsiu, aumenta rendimentu komunidade nian.

Rekizitu  bá selesaun micro, media no pequena empresas   ne’e sei fó oportunidade bá timoroan ne’e no empreza nasionál ne’ebe nia ezistensai empreza minimu tinan-lima (5), no kontinua fó oservisu no selu nia traballador sira iha tempu didsil nia laran hanesan Covid-19, kontinua selu impostu iha tempu Covid-19, hamosu inovasaun ruma hodi ultrapasa pandemia Covid-19 no kalamidade loron 4 fulan-Abríl 2021.

Rekizitu seluk mak  sira-nia atividade halo ona expansaun merkadu nasional no internasional, halao  atividade negosiu  iha setor komersiu no industria, kumpre regra ambiental, ijiene no seguransa.

Laiha inkumprimentu kreditu iha instituisaun finanseiru, kualidade produstu no servisu di’ak ho substituisaun produtu importadu.

Provas hirak ne’e nu’udar rekizitu selesaun ne’ebe empreza sira persija kumpre no komisaun avaliasaun kandidatu sei sei nomeia liuhosi pedidu MCI bá instituisaun relevante sira hanesan Ministeriu Finansas, Autoridade Tributaria,  Trade Invest, I.P, Serve I.P, BNCTL no CCI-TL.

 Setór indústria ne’ebe sei kompete mak hanesan;

1. Agro baze no industria ai-han
2. Fabrikasaun no prosesamentu mobiliariu husi ai ka au ho kualidade
3. Produsaun jus no bebida non alkoliku hodi substitui importasaun
4. Produsaun no prosesamentu ai-han animal nian ( hahan bá manu, no seluk-seluk tan)
5. Produsaun no transformasun botir-bee minerál no masin hodi subtitui importasaun
6. Prosesa ikan maran no ikan lata
7. Resiklajen hanesan transformasaun surat tahan, tixu, no lixu plastiku ba produtu ho valor akresentadu,
8. Industria deterjente
9. Indutria kreativa
10. Industria material konstrusaun

Setór Komersiu

1. Esporta ai-han esensial sira
2. Esporta material prima industrial
3. Komersializasaun ba produtu lokal

Jornalista : Leopoldina de Carvalho