Hatutan.com, (20 Novembru 2023), Díli–Banku Sentral Timor-Leste (BCTL, sigla portugés) hahú halo konsulta públiku bá nia parseiru sira, liuliu setór privadu sira  kona-bá oinsá atu halo tranzasaun dijitál bá servisu finanseiru.

Lee Mós: Governadór Foun BCTL Helder Lopes iha Kompromísu Hitu Atu Dezenvolve Seitór Finanseiru TL

Governadór BCTL, Helder Lopes. Foto/Tome da Silva

Governadór BCTL, Helder Lopes esplika BCTL  iha papél importante  oinsá atu promove pagamentu ne’ebé seguru, efisiente no konfortavel bá kliente no populasaun tomak, nune’e BCTL  iha mehi hodi servisu hamutuk ho entidade relevante tomak, inklui ho instituisaun finanseira Timor Leste hodi bele promove pagamentu dijitál ne’ebé bele fasilita prosesu tranzasaun sira iha Timor-Leste.

“Tanbasá mak ida-ne’e importante, tanba enkuantu ita promove pagamentu dijitál  ho tranzasaun dijitál ida-ne’e bele hamenus kustu bá prosesu tranzasaun, servisu finanseiru ne’ebé mak fó bá kliente ka fó bá ema sira ne’ebé asesu finanseiru,” Helder Lopes bá Jornalista sira, iha lansamentu atividade konsulta públiku Sistema Pagamentu Dijitál iha Otél Novo Turizmu, Díli, Segunda (20/11/2023).

Atu implementa programa ne’e, BCTL mós halo ona parseria  ho instituisaun finanseira sira hanesan banku UDTY, FINTEX iha Timor-Leste atu oinsá bele promove dijitál finance, liu-liu oinsá atu fasilita setór privadu sira atu  halo pagamentu dijitál bainhira hala’o sira-nia negósiu.

Antes ne’e BCTL mós halo konsulta públiku ne’e iha nivel munisípiu sira hanesan iha munisipiu Baucau, parte Baguia, Viqueque parte Uatulari no Munisípiu Ainaro parte Maubisse.

Tinan ida-ne’e BCTL kontinua halo konsulta públiku  iha Díli, tanba Díli nu’udar sentru ekonomia, hodi nune’e bele ajuda setor privadu sira liu-liu fasilita negosiante sira hatene halo pagamentu  dijitalizasaun.

Atu halo pagamentu digital ho efisiente, konfortavel no seguru bá populasaun presiza envolvimentu husi parte Governu nian hodi fasilita infrastrutura ne’ebé di’ak ba iha telekomunikasaun hodi bele oferese internet ida ne’ebé lais no di’ak liu, presiza mós iha ID (identidade) eletróniku ne’ebé inovativu.

Jornalista : Leopoldina de Carvalho