Hatutan.com, (06 Dezembru 2023), Díli—Provedoria dos Direitos Humanos e Justiça (PDHJ), liuhosi Adjunta Provedóra Maria Marília Ximenes C. da Costa, enkoraza ka fó hanoin bá sidadaun hotu-hotu, atu evita fahe informasaun falsa sira iha Média Sosial (MedSos) facebook Whatsapp, kona-bá ema ninian privasidade.

Partisipante sira foto hamutuk iha semináriu ho tema “Espasu Dijitál bá Promove Direitos Humanos”, hodi selebra loron internasionál bá direitu ema nian ba dala-75, iha salaun Liline Larigutu, CNE, Dili, Kuarta (06/12/2023).Foto: Elio dos Santos da Costa.

Adjunta Provedora PDHJ ne’e, rekomenda asuntu ida-ne’e hafoin halo abertura semináriu ho tema “Espasu Dijitál bá Promove Direitos Humanos”, hodi selebra loron internasionál bá direitu ema nian  ba dala-75, iha salaun Liline Larigutu, CNE, Dili, Kuarta (06/12/2023).

Lee Mós: BCTL Halo Konsulta Públiku Kona-bá Importánsia Tranzasaun Dijitál

Maria Marília Ximenes dehan, kna’ar no papél PDHJ nian maka selebra duni loron importante ida-ne’e, hodi haree bá objetivu ne’ebé mak temi kona-bá Espasu Dijitál.

“Durante ne’e ema uza espasu média hodi halo provokasaun no publika informasaun sira ne’ebé mak hanesan mál-informasaun uza online hodi publika buat sira ne’ebé mak ladun di’ak.Ida ne’e lori impaktu bá dignidade ema nian,” Adjunta Provedóra PDHJ hateten.

Iha semináriu ida ne’e, PDHJ konvida mós péritu sira hosi no instituisaun no organizasaun oioin, hodi fahe sira ninia perspetiva kona-bá Espasu Dijitál ne’ebé sidadaun sira utiliza, no oinsá ninia impaktu sira bá iha sosiedade.

“Ida ne’e mak ami halo semináriu ida-ne’e ho modelu interativu nune’e ita nia oradór sira, matenek na’in sira bele ko’alia liga liubá impaktu dijitál ne’e rasik,” nia hateten.

Partisipante sira iha semináriu ne’e mak haesan universitáriu, akadémikus, nomós organizasaun sosiedade sívil sira, bá ema ho defisiénsia, ne’ebé maka durante ne’e mós sai hanesan autór prinsipál sira atu hatene di’ak no bazeia bá ida ne’e, hodi sira mós bele fahe fali informasaun ne’e bá iha komunidade.

Adjunta Provedóra PDHJ ne’e konsidera tema kona-bá Espasu Dijitál ne’e sai asuntu ida importante, hodi bele fó koñesimentu bá iha komunidade sira, liu-liu estudante sira, tanba barak liu, sira mós uza internet, online sira ne’e.

PDHJ aprezenta mós esbosu balun kona-bá Cybernetica ninian. Maski sei hanesan esbosu de’it, maibé liuhosi semináriu ne’e, parte sira bele halo diskusaun ida kle’an liután, tanba haree bá kontestu Timor-Leste nian, governu presiza duni atu haree asuntu ida ne’e, oinsá mak atu implementa.

Hatán kona-bá Lei Cyberbetica nian, karik PDHJ mós ezíje Parlamentu Nasionál atu halo aprova lalaís bá lei ne’e, Adjunta Provedóra ne’e dehan, la’ós ezíje, maibé iha 2021 sira ko’alia tiha ona no ne’e foin esbosu de’it. Mais, to’o agora, seidauk iha hanoin ida atu halo.

Maske nune’e, PDHJ sempre prontu, karik tópiku ida kona-bá Espasu Dijitál ne’ebé dadauk ne’e sira debate hela iha semináriu ida ne’e, to’o finál, sei sai rekomendasaun ida bá sira, atu lori fila-fali bá halo diskusaun ho instituisaun no organizasaun oioin,  hafoin ida ne’e sei lori fila-fali bá Parlamentu hodi bele haree.

“Sé karik, ne’e mak aprova, di’ak liután, tanba governu ne’e mak iha nia papél ida boot liu, hodi haree ida ne’e, para bele implementa. Tanba sé lae, ita nian, hanesan ohin ha’u dehan tiha ona katak, empréza telekomunikasaun Timor Telekom, Telkomsel, Telemor, sira mós haruka informasaun sira ne’ebé maka ladun di’ak, no ita loke, ida mós bele estraga ita-nia pulsa, karun tán, depois, halo ema mós fahe tutan tán, entaun, sira mós kontribui hotu bá ida ne’e, tanba osan,” nia kestiona.

Tuir ajenda, iha ámbitu selebrasaun bá loron internasionál Direitus Umanus ne’e, domingu, 09 dezembru tinan ne’e, PDHJ sei hala’o mós atividade marsa saudável ida iha kapitál Dili, ne’ebé mak sei envolve no partisipa hosi entidade oioin ho inkluzivamente.

Eventu ne’e akontese tanba servisu hamutuk entre Misaun Nasaun Unidas nian iha TL ligadu ho asuntu direitus umanus nian ho instituisaun akadémika Universidade Nasional Timor-Lorosa’e (UNTL).

Jornalista: Rogério Pereira Cárceres