Hatutan.com, (08 Dezembru 2023), Díli—Arsebispu Arkedioseze Metropolitana Díli, Dom Virgílio Kardeál do Carmo da Silva husu sarani fiar na’in hotu-hotu ne’ebé ezerse knaar oioin iha sosiedade no Uma Kreda, tenke hatán bá apelu sinodalidade atu iha responsabilidade no hola parte ativu liután iha misaun Uma Kreda nian, misaun Jesus Cristo nian.

Arsebispu Arkedioseze Metropolitana Díli, Dom Virgílio Kardeál do Carmo da Silva prezide misa loron Na’in-Feto Imaculada da Conceição mahein bá Arkedioseze Metropolitana Díli no Ordenasaun Sacerdotal ba Diákonu Tadeu Osório dos Reis da Silva no Diákonu Vitor de Jesus, iha Igreja Katedrál Vila Verde, Sesta (08/12/2023). Foto: Vito Salvadór.

Dom Virgílio Kardeal do Carmo da Silva hato’o lia murak ne’e iha ámbitu selebrasaun loron Na’in-Feto Imaculada da Conceição ne’ebé sai hanesan mahein bá Arkedioseze Metropolitana Díli no Ordenasaun Sacerdotal ba Diákonu Tadeu Osório dos Reis da Silva no Diákonu Vitor de Jesus, iha Igreja Katedrál Vila Verde, Sesta (08/12/2023).

Arsebispu konsidera momentu ohin ne’e hanesan mementu furak, Uma Kreda iha mundu rai klaran halo selebrasaun, liu-liu ba sarani Timor ne’ebé konsagra no fihir Imaculada da Conceição nu’udár padroeira.

Ohin mós nu’udár momentu ida grasa nian ba ordenasaun sacerdotal, hanesan mós momentu agradesimentu ba dons sacerdócio ne’ebé Nai lulik sira simu iha tinan oin-oin, balun halo tinan rua nulu resin lima, balun sanulu no balun halo tinan rua ka tolu ba haat.

Ohin mós nu’udár loron espesiál no oportunidade ba relijiozu no relijioza sira ne’ebé pertense ba Arkedioseze Metropolitana Díli, ne’ebé selebra sira nia aniversáriu profisaun relijioza nian.

“Selebrasaun ida-ne’e bele mos sai hanesan bolu ka chamada ida atu ita ida-idak fila-fali ho espíritu Sínodu nian ba komunaun, partisipasaun no misaun,  oinsa mak chamada ida ne’e bele moris iha ema hotu-hotu ne’ebé ezerse knaar oin-oin iha sosiedade no Uma Kreda oinsa mak hatán ba apelu sinodalidade nian atu bele hola parte ativu liutan iha Uma Kreda nia misaun no Nai Jesus Cristo Nia misaun,” Dom Virgílio hateten.

Arsebispu Arkedioseze Metropolitana Díli, Dom Virgílio Kardeál do Carmo da Silva prezide misa loron Na’in-Feto Imaculada da Conceição mahein bá Arkedioseze Metropolitana Díli no Ordenasaun Sacerdotal ba Diákonu Tadeu Osório dos Reis da Silva no Diákonu Vitor de Jesus, iha Igreja Katedrál Vila Verde, Sesta (08/12/2023). Foto: Vito Salvadór.

Ema fiar na’in ida presiza halo tama kle’an liu tán iha komuñaun, partisipasaun no missaun, ne’ebé ema ida-idak simu iha loron Batizmu nian.

Iha Evanjellu ohin loron nian, apresenta bá umanidade tomak istória vokasaun ho forma ida diálogu. Iha mensajen importante hosi diálogu, iha Evanjellu ne’ebé Na’in-Feto Maria halo ho Anju maka “Ne’e sei sai oinsa loos, ha’u la hola mane” no liafuan ikus ho obediénsia hodi dehan “Ne’e sa atan oan mak ne’e, halo tuir Ita lia-fuan bá”.

Na’in-Feto Nia vokasaun mós hahú ho diálogu ida no iha diálogu ne’e mak Na’in-Feto espressa buat ne’ebé mai hosi laran, buat ne’ebé nia la komprende no la hatene Maromak atu realiza bá nia.

Iha diálogu ne’e, pergunta ne’ebé sai hosi Na’in-Feto Maria nia ibun atu manifesta ninia hamrook, atu hatene di’ak liután Maromak nia planu iha nia moris.

Hamrok ida-ne’e hatudu Na’in-Feto Maria nia kuriozidade atu hatene buat ne’e atu sai oinsa loos, tanba ne’e ikus mai anju dehan rahun di’ak tanba o fiar.

“Iha diálogu de’it mak ema bele deskobre Maromak nia hakarak, Na’in-Feto hanorin ita atu aprende rona, aprende atu tetu no aprende atu halo disernimentu katak, kompriende.  Tanba ne’e, bainhira ita ko’alia kona-bá Igreja sinodal nian maka Igreja ida ne’ebé rona lian Espíritu Santu nia liafuan no haklaken ba ema tomak,” nia esplika.

Iha rona mak ema bele haki’ak amizade, belun no besik liután ba Maromak. La’o hamutuk nu’udár mau-alin, tanba iha ema nia la’o hamutuk de’it mak bele fó forsa no lori ema ba to’o metas ne’ebé hakarak atinje. Amizade ho Maromak no ho mau-alin sira mak halo ema bele deskobre ksolok la’o hamutuk nian.

Sai Nai Lulik ho Espíritu Sinodalidade

Dom Virgílio Kardeal do Carmo da Silva hateten bá ordenadu na’in-rua katak, ordena iha ambiente prossesu sinodu nian ne’e, tenke sente orgullu, tanba ordena iha momentu istóriku ida iha Uma Kreda nian, sai Amu Lulik iha momentu ida sinodu nian.

“Ne’e atu dehan katak imi amu lulik jerasaun foun, mai ho espíritu sinodal ninian, amu lulik ne’ebé hatene promove buat ne’ebé la’o hamutuk nian, rona no amizade la’ós ho Maromak de’it, maibé imi bele sai mós dalan atu haforsa komuñaun entre Amu Lulik no ho sarani sira atu lori sarani sira bá Maromak,” Dom Virgílio hateten.

Ba Padre foun na’in-rua ne’ebé ohin hatan ona bá Maromak Nia bolu ho lia-fuan “SIM” no atu hatudu hakarak no hakarak ida ne’e la’os liafuan mamuk ida.

Hakarak ida ne’ebé dehan perante Asembleia bo’ot ida-ne’e iha implikasaun rasik ne’ebé iha tempu naruk nia laran lori ho responsabilidade.

Liu hosi na’in rua nia “SIM” provoka Nai Lulik hotu-hotu atu bele mós renova “SIM” dala ida tán, provoka mós sarani sira, liu-liu kaben-na’in sira atu renova sira nia fidelidade dala ida tán iha loron ida-ne’e, katak bainhira dehan “SIM” katak muda buat hotu.

“Saran an ba Maromak laos buat hotu derepenti deit, imi nain rua liu husi prosesu naruk bo’ot ida hodi lao mai to’o ohin, hodi hamrik iha ne’e atu hateten ‘Ha’u mak ne’e’. Imi na’in rua nu’udár frutu espirituál ida ne’ebé mós ho prosesu naruk,” subliña.

Tamba ne’e iha festa Imaculada da Conceição nian ne’ebé ohin hamutuk selebra, Na’in-Feto konvida hotu-hotu atu hatene hatuur idaidak nia identidade loloos iha nia fatin, bainhira fiar ne’e la’ós buat ida hosi liur de’it, maibé buka mós atu tau no halo Maromak hola parte esensiál iha moris nu’udár sarani, Amu Lulik, konsagradu, nu’udár kaben-na’in no nu’udár servidór povu ida-ne’e nian.

Jornalista: Vito Salvadór