Hatutan.com, (11 Dezembru 2023), Díli—Governu liu hosi Ministériu Komérsiu no Indústria (MKI), gasta $70.000-resin hodi komemora loron nasionál tais bá da-ruak nian hahú iha loron 09 to’o 14 Dezembru 2023 ho tema “Haburas Tais Bá Ha’u Rain” iha Centro Convencões Díli (CCD).

Ministériu Komérsiu no Indústria (MKI), komemora loron nasionál tais bá da-ruak nian hahú iha loron 09 to’o 14 Dezembru 2023 ho tema “Haburas Tais Bá Ha’u Rain” iha Centro Convencões Díli (CCD). Foto: Lazaro Pereira Quefi.

Koordenadór dezenvolvimentu tais MKI, António da Costa konsidera selebrasaun loron nasionál tais daruak nian hodi dezenvolve no prezerva hanesan kultura Timor nian, atu jerasaun foun sira kontinua nafatin no kreativu liu tán hodi hatudu nafatin nu’udár identidade.

Lee Mós: Governu Aprova 14 Dezembru Nu’udár Loron Nasionál Tais

“Orsamentu ne’e kuaze $70.000-resin ne’ebé prepara bá grupu sira hosi munisípiu mai to’o kapitál inklui atividade durante semana ida nia laran. Ita realiza kompetisaun grupu soru tais hosi munisípiu 12 inklui RAEOA,” António da Costa hateten iha CCD.

Kompetisaun soru tais ne’e atu transfere matenek lokál bá foin-sa’e Timoroan sira, nune’e tais sai mós forsa ekonomia rai laran ba kreativu ida furak liu.

Tais ne’e soru hosi baze kedan, nune’e la presiza ema matenek boot maibé kualkér ema importante iha koñesimentu kona-ba soru tais ne’e rasik.

Koordenadór dezenvolvimentu tais MKI, António da Costa. Foto: Lazaro Pereira Quefi.

Objetivu atu sai produtu nasionál liu hosi kabas ka soru tais, bainhira ema ruma soru signifika loke mós kampu traballu depois soru tais ne’e mós sai fali matéria prima bá diversifikasaun tais nune’e sei mosu fali ba alfaiate, sei transfere tais ne’e bá vestuária, bá uniforme, depende hosi ema nia nesesidade hanesan pasta, karteira no sessoria sira seluk.

Governu mós esforsu hela ho Komisaun Patromóniu Kulturál no Imateriál (PKI) atu bá resjista iha UNESCO katak Timor Leste tenke iha programa kona-bá salva guarda tais, tanba ne’e hahú hosi 2021 to’o 2025 implementa ona progarama salva guarda tais.

Liu hosi kompetisaun soru tais, sei iha promosaun liu hosi feria no iha treinamentu atu hadi’a kualidade, nune’e mós halo peskiza bá iha tais ne’e rasik iha Timor-Leste tomak ne’ebé mak membru PKI implementa tuir área idak-idak nian.

Governu liu hosi parte Arte no Kultura nian sei haree liu bá tais, atu haree ka halo peskiza ba tais hodi labele lakon iha Timor Leste no Fundasaun Alola iha funsaun atu haree kona-bá kabas nia kualidade, MKI nia funsaun atu fó treinamentu hodi dezenvolve tais ne’e bá diversifikasaun bá produtu oioin ne’ebé ho nia valór tradisionál.

Grupu sira ne’ebé mak soru tais ne’e iha balun uza sira nia fundu rasik mak sira la’o no forma sira nia grupu, grupu balun fali la’o maibé hetan apoiu hosi Ministériu relevante no NGO balun tán.

Jornalista Estajiariu: Lazaro Pereira Quefi