Hatutan.com, (20 Dezembru 2023), Díli– Sekretáriu jerál partidu FRETILIN, Mari Alkatiri, haktuir Prezidente Repúblika iha kompeténsia fó indultu, maibé la’ós troka fali Tribunál.  

Lee Mós: Emília Pires Merese Hetan Indultu Tanba Kontribui bá Luta Ukun-an no Prosesu Dezenvolvimentu TL

Sekretáriu jerál Partidu FRETELIN, Mari Alkatiri. Foto/Elio dos Santos da Costa

“Prezidente Repúblika atu fó indultu ne’e kompeténsia Prezidente nian. Mais, la’ós fó indultu para atu troka fali tribunál ne’e labele, indultu ne’e visa kondenada la’ós para troka fali tribunál. la’ós labele fó maibé tuir regra ka la tuir regra no tuir prosedimentu ka latuir prosedimentu ne’e oinsá. agora nia Emília Pires ka Madalena Hanjan ha’u lakohi diskuti kona-bá ida-ne’e,” Mari Alkatiri hateten hodi reponde bá jornalista sira iha PN, Tersa (20/12/2023).

Mari Alkatiri lakohi ko’alia ema ida kondenada tanba la’ós nia kompeténsia, maibé ne’e servisu tribunál nian.

“Iha Timor buat ida sala maka ne’e tribunál seidauk kondena, sosiedade maka kondena uluk ne’e mós laloos  sé ita dehan ne’e kompeténsia tribunál nia husik tribunál maka trata lai, la’ós sosiedade sivíl, sosiedade militar, sosiedade hotu maka kondena uluk ona. Ita hotu hakarak sai juíz,  Prezidente Repúblika rasik hakarak sai juíz, primeiru Ministru atuál hakarak sai prokuradór ha’u hanoin loos ha’u ko’alia la sala,” Mari Alkatiri tenik.

Mari Alkatiri mós haktuir labele kontinua nafatin ho konflitu interioridade. Estadu ne’e iha riin haat; Prezidente Repúblika,  Parlamentu Nasionál, Governu no Tribunál, ida-idak ho nia kompeténsia ne’e maka estadu de direitu, uluk tempu imperadória sira nian ne’e buat seluk, nune’e atu sai imperadór la’ós buat fasil.

Jornalista Estajiária:  Zita Menezes