Hatutan.com, (29 Dezembru 2023), Díli—Komandu Polísia Nasionál Timor Leste (PNTL) sei koloka membru iha Igreja sira no halo operasaun móvel tamas ai bairru sira iha kapitál Díli atu assegura selebrasaun tinan foun 2024.

Membru Polisia Nasional Timor Leste (PNTL) partisipa iha parada militár iha komemorasaun loron proklamasaun unilaterál independénsia Timor-Leste bá dala-XLVIII ne’ebé hala’o iha Palásiu Prezidensiál Nicolau Lobato Bairru-Pité, Tersa (28/11/2023). Foto: Elio dos Santos da Costa.

Komandante Operasaun Nasionál PNTL, Superintendente Xefe Polísia José Soares hateten, komandu jerál liu hosi área operasaun ninian hatuun ona diretiva operasionál bá munisipiu sira molok Natál, tinan-foun, Polisia sei alerta to’o iha loron 02 fulan-janeiru, atu assegura sarani hotu-hotu goza nia direitu hakmatek, no direitu haksolok ninian, tuir Santa Igreja haruka.

Lee Mós: Natal Iha Vatikanu, Papa Francisco Haklaken Dame bá Mundu

“La’ós tuir ida-idak nia hakarak, no ida-idak nia vontade rasik sá tán, kontra órden konstitusionál. Iha Igreja sira, ita sei kolok ita nia membru iha ne’ebá, depois misa hotu, ita sei halo patrullamentu móvel, atu bele garante estabilidade,” Komandante José Soares hateten iha Centro de Formação Policia (CFP), Comoro, Sesta (29/12/2023).

Komandante Operasaun Nasionál ne’e dehan, iha loron tolu liubá, povu no sarani tomak selebra ona festa Natál, no ema hotu-hotu haksolok, simu Kosok Oan Na’i Jesus Cristo, ne’ebé mak moris mai lori ksolok no domin bá família sarani Katólika, liu-liu iha Timor laran.

Nia husu joven sira labele interpreta sala, ksolok Natál ne’e bá ksolok sira-ninia an de’it hodi haluha tiha valores Natál ninian.

Jesus lori ksolok bá ema hotu, la signifika joven sira ida-idak halo ksolok rasik, hodi hasees tiha lei sira ne’ebé mak vigóra iha rai ida-ne’e, hodi hemu tua lanu iha kualkér fatin.

“Hemu lanu iha ne’ebé, iha uma, iha lutu laran ka uma-laran. Bainhira la impede família ida ou bairu ida, ne’e direitu ema ida-idak nian. Maibé, kuandu hemu hodi disturba fali família seluk, viziñu seluk, aldeia seluk, ne’e viola ona órdem konstitusionál,” Komandante José Soares hateten.

Husu joven sira atu labele hemu fali tua iha fatin sira hanesan prezépiu laran, tanba ne’e fatin santu ninian, hanesan sarani Katólika tenke valoriza rasik.

“Iha Natál, iha insidente ida rua akontese, ita nia esforsu tomak, PNTL hodi kontrola situasaun iha kapitál. Iha dia 31 kalan, ita sei intensiva fila-fali ita nia prezensa, patrulla, kapitál Dili sei hetan reforsa tán hosi sentru formasaun, hosi komandu jerál, ho sira seluk atu bele koloka iha kapela, iha Igreja sira iha kapitál Dili, atu bele asegura,” nia esplika.

Nia informa katak, bainhira rona iha konflitu balun, liga lalais bá iha númeru kontaktu polisia nian, 3331282.

Jornalista: Rogério Pereira Cárceres