Hatutan.com, (11 Janeiru 2024), Díli—Deputadu Manuel Henrique Noronha simu konfiansa hodi substitui António da Conceição “Kalohan” nu’udár Xefe bankada Partidu Demokrátiku (PD) iha Parlamentu Nasionál (PN).

Xefe Bankada PD, Deputadu Manuel Henrique Noronha. Foto: Zita Menezes.

Deputada Maria Teresa haktuir,  iha loron 10 fulan janeiru 2024 Vise bankada PD anteriór, deputada Shanca Margarida Tilman konvoka enkontru ho deputadu na’in-neen hosi bankada PD hodi halo eleisaun bá xefe bankada foun.

Lee Mós: Prezidente Repúblika Husu Embaixadór Na’in-Neen Reprezenta Duni Imajen TL

“Demókratikamente ami halo duni eleisaun hodi hili deputadu Manuel Noronha nu’udár xefe bankada foun PD, deputadu Armando Lopes nu’udár vise no deputada Rosenha Martins ho deputadu Sancha Margarída Tilman assumi fali kargu iha konsellu administrasaun iha Parlamentu Nasionál,” Maria Teresa hateten iha PN, Kinta (11/01/24).

Deputadu sira hosi Bankada PD halo eleisaun sekreta ho ninia rezultadu a-favór 4 hosi pakote rua mak hanesan pakote A deputadu Manuel Henrique Noronha no Armando Lopes no pakote B deputada Sancha Margarída Tilman ho deputada Rosena Martins.

Iha lorom 12 fulan Dezembru 2023, Prezidente Repúblika (PR), José Ramos-Horta fó posse bá António da Conceição hanesan Embaixadór Timor-Leste bá Repúblika Indonézia (RI) ho mandatu tinan tolu.

Jornalista Estajiária: Zita Menezes