Connect with us
Pakote Ahi

Internasionál

TL iha Ona Faze Ikus Atu Sai Membru OMK

Published

on

Hatutan.com, (12 Janeiru 2024), Díli—Timor-Leste (TL) marka ona pasu signifikativu iha jornada  integrasaun ekonomia globál ne’ebé konklui ona ho sussesu liu hosi Reuniaun Grupu Traballu Dahitu hodi adere bá Organizasaun Mundiál Komérsiu (OMK). 

Delegasaun Timor-Leste xefia hosi Miguel Marques Gonçalves Manetelu, hamutuk ho Ministru Komérsiu no Indústria, Filipus Nino Pereira no hetan akompañamentu hosi embaixadora Maria de Lurdes Martins de Sousa Bessa, Reprezentante Permanente Misaun Timor-Leste nian iha Jenebra partisipa iha Reuniaun Grupu Traballu dahitu adere bá OMK, iha Jenebra Suiça. Foto: Ekipa OMK.

Reuniaun ne’ebé hala’o iha Jenebra, Suíça loron 11 Janeiru 2024, marka pasu krusiál bá Timor-Leste antes Konferênsia Ministeriál OMK nian bá dala 13 (MC13) ne’ebé sei akontese iha loron 26 to’o  29  fevereiru 2024 iha Abu Dhabi,  Emiradus Árabes Unidus, hodi simu pedidu Timor-Leste nian  sai membru OMK.

Lee Mós: Grupu Traballu Adezaun TL bá OMK  Konklui Reuniaun Da-neen

Iha sesaun abertura, Xefe Negosiadór Timor-Leste nia adezaun bá OMK, atuál Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Fransisco Kalbuadi Lay, reprezenta hosi  Miguel Marques Gonçalves Manetelu, Ministru Transporte no Komunikasaun afirma ho  firmeza kona-bá kompromisu Timor – Leste nian.

Advertisement

“Adezaun Timor-Leste bá OMK nu’udár  veíkulu ida hodi aselera reforma importante sira ne’ebé esensiál tebes hodi promove kresimentu ekonomia ne’ebé sei transforma Timor-Leste sai país klase média ho dezenvolvimentu ne’ebé saudável ho  edukasaun altu hodi atinji  objetivu kona-bá  boa governasaun, estabilidade no paz,” Hatutan.com sita komunikadu.

Delegasaun Timor-Leste xefia hosi Miguel Marques Gonçalves Manetelu, hamutuk ho  Ministru Komérsiu no Indústria, Filipus Nino Pereira no hetan akompañamentu hosi  embaixadora Maria de Lurdes Martins de Sousa Bessa, Reprezentante Permanente Misaun Timor-Leste nian iha Jenebra hatudu ona vontade Timor-Leste nian bá páis membru OMK sira, hodi kumpri obrigasoens nu’udár  nasaun ne’ebé iha responsabilidade bá rekezitus OMK nian, hahú hosi Reuniaun Grupu Traballu Dahuluk iha outubru 2020 até Reuniaun Grupu Traballu Dahitu ne’ebé konsideradu nu’udár Reuniaun Grupu Traballu Daikus nian antes Timor-Leste sai membru plenu OMK liuhosi Konferênsia Ministerial  OMK (MC13).

Konferênsia Ministeriál nu’udár reuniaun ho páis membru sira OMK nian hodi bele toma desizaun kona-bá kualkér akordu komersiais multilaterais nian no mós medida sira seluk kona-bá futuru OMK nian.  

Konferênsia Ministeriál ne’ebe sei realiza iha Abu Dhabi tinan ne’e sei prezidi husi Dr. Thani bin Ahmed Al Zeyoudi, Ministru Estadu Komérsiu  Eksteriór hosi Emirados Árabes Unidos.

Iha sesaun ikus antes atu termina intervensaun Timor-Leste nian iha Reuniaun Grupu Traballu Dahitu, Governu Timor-Leste espresa ninia agradesimentu profunda bá páis membru OMK sira liu liu bá apoiu no kolaborasaun  durante  faze krusiál iha prossesu adezaun Timor-Leste nian ba OMK.

Advertisement

“Permite ha’u reprezenta Governu Konstitusionál Dasia, hamutuk ho ami nia  Líder bo’ot, Primeiru-Ministru Timor-Leste, Kay Rala Xanana Gusmão no  ami nia Xefe Negosiadór, Fracisco Kalbuadi Lay, hakarak  espresa ami nia agradesimentu wa’in bá ita bo’ot sira. Ami hakarak  konvida ita bo’ot sira hodi marka prezensa iha MC13 ne’ebé sei hala’o iha Abu Dhabi, fulan Fevereiru tinan ne’e, hodi sai testemuña bá momentu istóriku adezaun Timor-Leste nian bá organizasaun ne’e. Tamba ita sira nee mak autor própriu iha prosesu hirak ne’e,” Miguel Marques Gonçalves Manetelu, hateten.

Esforsu ba vontade Timor-Leste nian hodi sai membru OMK hatudu ona liuhosi boas prátikas durante ne’e  hanesan, halo  revizaun bá rejime ekonómiku no komérsiu  esternu hodi responde  perguntas besik 300 hosi país membru OMK sira ne’ebé motiva tebes Timor-Leste bá kestaun  espesífika iha  âmbitu reforma ekonomia nian.  

Timor-Leste finaliza mós akordu bilaterais ho páis membru OMK 10 hanesan Austrália, Kamboja, Kanadá, Indonézia, Japaun, Uniaun Europeia, Nova Zelândia, Filipinas, Tailândia no Estadus Unidus iha tempu fulan 17 nia laran.

Ikus liu, aseita mós ba kompromisu  espesífiku 31 kona-bá adezaun nian ho assesu ne’ebé boot hosi relatóriu grupu traballu sira inklui kompromissu foun kona-bá fasilitasaun komérsiu, regulamentasaun  interna hosi servisu Information Technology Agreement.

Jornalista: Rogério Pereira Cárceres

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Internasionál

Tinan 25 WFP, Hosi Apoiu Umanitáriu bá Dezenvolvimentu Sustentável iha TL

Published

on

Hatutan.com, (18 Jullu 2024), Díli—Programa Ai-han Mundiál ka World Food Programme (WFP) kompleta tinan 25 bá nia prezensa iha Timor-Leste (TL) no mós halo inaugurasaun eskritóriu nasionál foun iha resintu Pateo, Colmera, Dili, kuarta (17/07/2024).

(more…)

Kontinua Le'e

Internasionál

Ramos-Horta Felisita Primeiru-Ministru Reinu Unidu Keir Starmer

Published

on

Hatutan.com, (16 Jullu 2024), Díli—Prezidente Repúblika (PR), José Ramos-Horta felisita no hato’o parabéns bá Primeiru-Ministru eleitu Reinu Unidu, Keir Starmer.

(more…)

Kontinua Le'e

Internasionál

MNEK ho Sekretáriu Ezekutivu CPLP Diskute Preparasaun bá Reuniaun Konsellu Ministru CPLP

Published

on

Hatutan.com, (13 Jullu 2024), Díli- Ministru Negósiu Estranjeiru no Kooperasaun (MNEK), Bendito dos Santos Freitas, Sesta (12/07/2024), hala’o enkontru kortezia ida ho Sekretáriu Ezekutivu Comunidos dos Países da Língua Portuguesa (CPLP), Zacarias Albano da Costa, hodi ko’alia kona-bá preparasaun ba enkontru anuál Konsellu Ministru CPLP ne’ebé sei hala’o iha loron 19 fulan-Jullu, tinan ne’e, iha São Tomé e Principe.

(more…)

Kontinua Le'e
Advertisement

Trending