Hatutan.com, (22 Janeiru 2024), Díli—Membru Konsellu Reprezentantivu Rejionál Repúblika Indonezia-Bali, Arya Wedakarna lori Komunidade Hinduízmu Bali nia naran agradese bá Estadu Timor-Leste (TL) ne’ebé konstrui ona Templu Pura Gira Nhat iha Tabesi-Dili bá komunidade Hinduízmu iha TL.

Primeiru-Ministru (PM), Kay Rala Xanana Gusmão akompaña hosi autoridade provínsia Bali, Indonézia inaugura edifisiu foun Konsul Jerál Repúblika Demokratica de Timor-Leste (RDTL) iha Provínsia Bali (19/01/2024). Foto: GPM.

“Obrigadu Primeiru-Ministru Xanana Gusmão ho ekipa tomak. Agradese tanba Estadu Timor-Leste harii ita nia Pura hodi hatudu ba povu Bali katak, Pura Gira Nhat iha Tabesi-Dili ne’e hatudu tebes domin no respeita ba komunidade Hinduízmu iha Timor-Leste,” Hatutan.com sita komunikadu ne’ebé haktuir deklarasaun Arya Wedakarna iha diskursu durante partisipa serimónia inagurasaun edifísiu foun Konsul Jerál Timor-Leste iha área Tukad Mas I/no 4-Renon Bali (19/01/2024).

Lee Mós: Hinduísmo iha TL Selebra Loron Vitória, Ramos-Horta Husu Tane As Toleránsia Relijioza

Estadu no Komunidade Hinduízmu Indonézia sente orgullu, prossesu kontrusaun Pura Gira Nhat iha Tabesi-Dili halo ho kualidade to’o serimónia inaugurasaun hosi Prezidente Repúblika, José Ramos-Horta iha loron 08 Agostu 2023.

Arya Wedakarna konsidera apoiu ne’e nu’udár aktus torelánsia no fraternidade umana Timor-Leste nian ne’ebé respeita tebes relijiaun hotu-hotu liu-liu direitu sidadaun involve iha kualkér atividade relijiuan nian.

Sidadaun Bali maioria relijiaun Hindu, barak servisu iha Timor-Leste iha área oin-oin hanesan, seitór turizmu, otél no harii restaurante no seluk tán.

Membru Konsellu Reprezentantivu Rejionál Repúblika Indonezia-Bali, Arya reforsa tán, ba oin koopersaun entre Governu ho Governu no povu ho povu bele kontinua metin liu tán fó benefisiu ba rai rua.

Antes ne’e, Ramos-Horta informa Estadu konstrui fatin reza ne’e hodi hato’o solidariedade no fraternidade hosi Timoroan hotu-hotu bá komunidade Hindu ne’ebé hela iha Timor-Leste.

Ramos-Horta dehan, Pura Taibesi hola parte kultura diversidade iha Timor-Leste, iha sivilizaun relijiaun oin-oin, bo’ot ka ki’ik importante hatudu respeitu bá kultura fiar nian.

Governu liu hosi Serviço de Apoio à Sosiedade Civil e Auditoria Sosiál (SASCAS),  apoia fundu bá obra rehabilitasaun no melloramentu ba pura Taibessi dezde 2018, ne’ebé nia inisiativa mai hosi antigus alunus Timoroan iha Bali, ne’ebé hanaran IKAYANA no hetan atensaun bo’ot hosi VI Governu Konstitusionál, lideradu Eis Primeiru-Ministru, Rui Maria de Araújo.

Governu fó apoiu bá pura Taibessi liuhosi IKAYANA ho millaun $1.2 bá rehabilitasaun to’o remata.

Pura ne’e harii dezde tempu Indonézia no inaugura hosi Saudozu Eis Governadór Timor-Timur, Ir. Mario Viegas Carscalão, iha loron 27 Juñu 1987.

Jornalista: Rogério Pereira Cárceres