Hatutan.com, (23 Janeiru 2024), Díli— Ekipa Integradu Ministériu Saúde (MS) ne’ebé kompostu husi Ospitál Nasionál Guido Valadares (HNGV), Diresaun Nasionál Farmásia no Medikamentu, Servisu Nasionál Ambulánsia Emerjensia Médiku ( SNAEM), Institutu Nasionál Fornesimentu Produtu Médiku (INFPM) no  Diresaun Nasionál Aprovizionamentu, klarifika kona-bá  informasaun ne’ebé espalla dehan katak estoke out ai-moruk enoxaparin fó implika kondisaun saúde Ministru Justisa Saudozu  Amândio de Sá Benevides.

Lee Mós: Xanana Agradese Fundasaun GX Ne’ebé Oferese Ekipamentu Saúde Tonelada 10 Atu Kombate Dengue

Ekipa Integradu Ministériu Saúde atualiza informasaun bá públiku, Tersa (23/01/2024). Foto/Tome da Silva

Diretór  Serviços Apoio Diagnóstico no Terapêutica, dr. Vidal de Jesus Lopes, konfirma katak informasaun hirak ne’e laloos tanba estoke ai-moruk enoxaparin normal hela.

“Kronolojia akontesimentu matebian monu iha aeroportu  Internasionál Prezidente Nicolau Lobato hetan atendimentu dahuluk ka primeiru sokorru husi Vise-Ministru Saúde  ne’ebé hanesan médiku mós halo kedan Cardiopulmonary resuscitation (CPR) depois ambulánsia mós to’o lori mai ospitál ho kondisaun paragem cardiorrespiratória (PCR) ka is laiha ona,”  dr. Vidal de Jesus Lopes haktuir liuhosi konferénsia imprensa iha INFPM, Tersa (23/01/2024).

Nia klarifika katak pasiente sira ne’ebé mak mai ho kondisaun parajem cardirespispiratória ka is laiha ona, laiha indikasaun atu fó ai-moruk enoxaparin. Mezmu iha momentu ne’ebá estoke Enoxaparin estabil hela iha HNGV.

Nia mós rejeita ho informasaun hanesan kona-bá ambulánsia husi HNGV  to’o tarde iha aeroportu Nicolau Lobato laloos.

“Hakarak atu klarifika katak Matebian monu iha tuku 12:25  Otl, hafoin kontaktu ambulánsia no ambulánsia to’o se la sala kuaze minutu 7 ka minutu  10 hafoin ekipa  to’o iha aeroportu sei konsege ajuda matebian halo resuxita ka CPR, hafoin evakua hosi aeroportu bá HNGV to’o iha oras 12:45 Otl,” Vidal de Jesus Lopes hateten.

Iha biban ne’e Ekipa Integradu husi MS ne’e mós partilla informasaun kona-bá lala’ok servisu tékniku nian hosi komponente MS nian liga ho preokupasaun públiku kona-bá atendimentu, estoke out ai-moruk, konsumavies, reajente, no rekursu umanu nian.

Nia hateten, dau-daun ne’e estoke out ai-moruk iha HNGV ho 13%, no iha INFPM 22%. Nune’e, Semana kotuk, iha INFPM estoke out 34% no  agora tun bá 22%, tanba atualiza ona dadus.

“Iha item medikamentu balun ne’ebé la tama ona iha merkadu no atualmente la utiliza ona, tanba sira ne’e mak durante ne’e eziste no kontribui bá stock out sa’e,” Vidal Lopes relata. 

Estoke out ai-moruk iha HNGV, nia hatutan, semana kotuk 10% agora aumenta bá 13% tanba ida ne’e dinámiku ne’ebé depende bá fornesedór ai-moruk ne’e, no depende mós bá utilizasaun ai-moruk. Entermu  estoke ne’ebé disponivel hela laiha afetasaun grave ka implika bá sistema saúde ne’ebé kolapsu, ne’e lae.

Tuir relatóriu hosi Ekipa Integradu MS katak daudaun ne’e situasaun mantein funsionamentu normal no alternativu balu mak médiku sira foti hodi mantein funsionamentu atendimentu ba pasiente sira.

Ai-moruk agora daudauk informasaun husi INFPM katak iha loron 25 to’o loron 27 fulan-Janeiru 2024 sei iha kontentór 4  mak sei mai husi kompañia Sali-Magu hodi bele responde ona nesesidade urjente.

Jornalista : Leopoldina de Carvalho