Hatutan.com, (26 Janeiru 2024), Bogor—Hafoin presta omenájen iha Jardin Erois Kalibata, Primeiru-Ministry, Kay Rala Xanana Gusmão, halo kedan viájen bá Palásiu Prezidensiál, hodi hasoru malu ho Prezidente Repúblika Indonézia, Joko Widodo, iha Bogor, Jawa Oeste.

Primeiru-Ministru (PM), Kay Rala Xanana Gusmão ho Prezidente Repúblika Indonézia (RI), Joko Widodo, kuda ai-oan Hopea Odorata iha resintu Prezidénsia Repúblika, Bogor, Jakarta, Sesta (26/01/2024). Foto: Rogério Pereira Cárceres.

Xanana to’o iha Palásiu Bogor iha tuku 09:00 dadeer oras Indonézia nian. Iha Bogor, Xefe Governu RDTL ne’e ho Ministru Negósiu Estranejeiru no Kooperasaun (MNEK), Bendito Freitas hala’o kedan enkontru ho Prezidente Jokowi no Ministru Negósiu Estranjeiru Repúblika Indonézia nian, Retno Marsudi.

Lee Mós: Xanana Iha Ona Jakarta, Laiha Ajenda Asinatura Akordu Fronteira Terrestre

Hafoin sorumtu ne’e, PM Xanana ho PR Jokowi hakat kedan bá iha fatin ne’ebé ekipa protokolár prepara ona ai-oan Hopea Odorata (pohon merawan), iha resintu prezidénsia repúblika no sira na’in rua iha ambiente amigável tebes kuda ai-oan ne’e.

Xanana ho ninia karákteristika hamnasa, oin kmaus, no espresaun amigável halo kómiku to’o  Jokowi  konsege hamnasa fila-fila, sira na’in-rua foti kedan kanuru ne’ebé prepara tiha ona, sira suru rai-henek dala-rua, tau bá rai-kuak.

Hafoin ida-ne’e Jokowi mós foti bee hodi rega no fase PM Xanana nia liman, sira ho hamnasa nafatin bá malu ho espresaun hanesan la’ós ema foun mak hasoru malu.

Hafoin kuda tiha oi-oan Hopea Odorata, Xanana ho Jokowi konvida malu hodi fila-fali kedan bá salaun enkontru Palásiu Bogor nian.

Dadadun ne’e, PM Xanana ho Prezidente Jokowi ne’ebé akompaña hosi Ministru Negósiu Estranjeiru no Kooperasaun (MNEK), Bendito Freitas, Ministru Planeamentu Investimentu Estrateziku (MPIE), Gastão de Sousa, Ministru Transporte no Telekomunikasaun, Miguel Marques Manetelo, Sekretariu Estadu Komunikasaun Sosiál (SEKOMS), Expedito Dias Ximenes no ekipa Gabinete Fronteira Maritima no Terrestre, inklui membru governu importante sira Governu RI nian, hala’o hela enkontru Bilaterál, no ikus liu, sei realiza konferénsia imprénsa.

Jornalista: Rogério Pereira Cárceres