Hatutan.com, (30 Janeiru 2024), Díli—Parlamentu Nasionál (PN) Aprova ona Rezolusaun Númeru 26/VI/1⁰ bá apoiu tékniku bá kada deputadu ho saláriu kada fulan $1.700 kada fulan to’o mandatu remata.

Parlamentu Nasionál (PN) halo votasaun bá espesialidade OJE 2024 alokadu bá Parlamentu nian, Kinta (14/12/2023). Foto: Tomé da Silva.

Rezolusaun ne’e aprovadu iha Tersa (29/01/2024) ho rezultadu votasaun a-favór 58, kontra zero (0) no abstensaun (0). 

Lee Mós: PN Aprova Subsídiu Saúde, Kada Fulan Deputadu Ida Simu $600

Rezolusaun ne’e prepara hosi Xefe Bankada CNRT, Deputadu Duarte Nunes, Bankada FRETILIN deputadu  Aniceto Lopes Guterres, Xefe bankada PD Manuel Henrique Noronha no deputadu KHUNTO António Verdiál nomós deputadu PLP Helder Freitas Kamarudin.

Sekretária Meza, deputada Virgínia Ana Belo iha Plenária, hateten Rezolusaun númeru 22/2023/29 de dezembru hateten, kada deputadu iha Parlamentu Nasionál iha direitu atu halo kontratu bá sidadaun nasionál ida ho ninia grau akadémiku pelu menus lisensiatura atu bele presta asisténsia téknika livremente indikadu hosi deputadu ne’e rasik.

“Tékniku ne’e PN sei selu ka ho nia remunerasaun ho valór másimu kada fulan tuir buat ne’ebé termina ona iha PN,” nia hateten.

Tanba ne’e, PN rezolve iha termu hosi artigu 92 KRDTL númeru 5 artigu 12/2004  5 Maiu iha estatutu deputadu sira nian alterada hosi Lei númeru 7/2017 26 Abril, 4/2023 Janeiru no 22/2023/29 dezembru hanesan tuir mai ne’e:

1. Fixadu iha $1.700 hanesan valór másimu bá renumerasaun mensál no likida atu selu tékniku apoiu deputadu kontratadu atu presta durante asisténsia iha sesta lejislatura.
2. Revogada 2 rezolusaun hosi Parlamentu Nasionál numeru 19/2023/6 Juñu.
3. Aprezenta rezolusaun prodús feitu 01 Setembru 2023.

“Distintu deputadu sira,  rezolusaun maka ne’e. Tanba ne’e ha’u loke bá apresiasaun tanba ne’e ita aprova tiha ona iha ita nia estatutu ne’ebé hadi’a. Ne’e tanba Kamara Kontas ezizi katak, konsellu administrasaun labele rezolve mesak tuir dezisaun tenki lori mai plenária atu ita hotu iha responsabilidade,” PPN Maria Fernanda Lay hateten iha Plenária, Tersa (30/01/2024).

Deputadu sira halo mós votasaun bá rezolusaun númeru 27 rejime subsídiu bá deputadu sira ho rezultadu votasaun Afavór 57 abstensaun Zero (0) no kontra Zero (0).

Jornalista Estajiária: Zita Menezes