Hatutan.com, (07 Fevereiru 2024), Díli- Prezidente Repúblika (PR), José Ramos-Horta tau konfiansa tomak bá Xefe Negosiadór Prinsipál Fronteira Terrestre no Primeiru-Ministru (PM), Kay Rala Xanana Gusmão atu solusiona polemika fronteira tterrestre iha Naktuka ho Indonézia.

Lee Mós: Xanana: Akordu Fronteira Terrestre TL-RI Tenke Benefísia Povu

Prezidente Repúblika, José Ramos-Horta to’o fali iha Timor-Leste hafoin halo vizita bá Italia, Fransa, Reinu Unidu no Abu Dhabi. Foto/Elio dos Santos da Costa

Prezidente Repúblika José Ramos-Horta hato’o deklarasaun ne’e bá jornalista sira iha Aeroportu Internasionál Prezidente Nicolau Lobato, Díli, Kuarta (07/02/2024), hafoin fila hosi vizita estadu bá Italia, Fransa, Reinu Unidu no Abu Dhabi.

“Ha’u tane polítika Governu nian, Primeiru -Ministru nian,  ha’u konfiansa 100%  bá Primeiru Ministru  nia maka Xefe negosiadór. Kuandu  nasaun ida, rai ida nomeia ema bá negosiadór, liu liu ema ida estatutu hanesan Maun Boot Xanana, ha’u bele konfiansa 100% katak nia sei fó solusaun di’ak bá povu Timor-Leste, liu-liu iha rai ketan Naktuka. Husik ba Xefe negosiadór halo servisu, la’ós husi kotuk  polítika oioin  komesa ko’alia mangame iha Parlamentu no fatin-fatin,” Prezidente Repúblika José Ramos-Horta afirma.

Xefe Estadu husu atu polítiku na’in sira labele politiza situasaun iha terrenu hodi halo deklarasaun oin-oin ne’ebé la kontribui bá prosesu sira atu iha solusaun ba fronteira terrestre nian iha Naktuka, Rejiaun Administrativu Oé-Cusse Ambeno (RAEOA).

“Ha’u nunka  haree rai ida mundu kuandu xefe negisiadór halo  negosiasaun,  opozisaun komesa kritika,  hatama kanuru tohar iha prosesu. Purtantu ha’u kontinua fó apoiu 100%  Xefe negosiadór ho nia ekipa atu hetan solusaun ba markasaun definitiva iha fronteira terrestre ita nian,” Ramos-Horta tenik.

Ramos-Horta dehan husik servisu negosiasaun bá fronteira terrestre remata para depois bele muda ka haksoit bá  negosiasaun fronteira marítima.

Indonézia rasik nasaun halo   tinan 70 hetan independénsia kakutak uitoan esperiénsia  fronteira sira nian seidauk halo hotu 100 %  formalizadu. Foin daudaun tinan ida liubá maka halo fronteira marítima ida  ba to’o tribunal ho Malayzia kona-bá  fronteira  parte balun terrestre ninian.

Malayzia ho Singapura ba Tribunál, Austrália ho Nova-Zelándia tinan 50 maka hetan akordu no Timor-Leste, tuir Ramos-Horta nia sorte tanba maun Boot Xanana.

“Austrália tinan 50  nia laran ho líder seluk  Austrália hein to’o tinan 50 atu halo saida, ne’e duni ha’u husu ba matenek boot sira rai ne’e, ha’u haree ko’alia makas loos, maibé ita husik de’it maun Xanana maka tau matan ba ida-ne’e. Solusaun ne’ebé Maun boot Xanana hetan ho Indonézia, klaru sei formál, nia ko’alia saida maka sei halo ha’u  apoiu,  ha’u fó konfiansa bá ekipa Governu nian  halo susesu bá sira,” Ramos-Horta hateten.

Jornalista: Vito Salvadór