Hatutan.com, (07 Fevereiru 2024), Díli—Autoridade Portuáriu Timor Leste (APORTIL) ho Ministériu Transporte no Komunikasaun (MTK), no mós Ministériu Defeza (MD) koordena ona ho membru Forsa Navál sira ne’ebé molok ne’e destaka iha uma-adat antigu ho kakuluk aat ho sira nia ró ne’ebé atraka iha portu Díli, hahú muda sees ona sira-nian sasán, tanba iha tempu besik, kompañia atu hahú prossesu rehabilitasaun.

Edifísiu ho kakuluk aat iha Portu Díli, Kinta (08/02/2024). Foto: Elio dos Santos da Costa.

Prezidente APORTIL, Feliciano da Costa, preokupa ho uma adat antigu ne’ebé hamriik hela ho nia kakuluk aat desde independénsia mai to’o ohin loron.

Lee Mós: Kondisaun Edifísiu Terminál Portu Díli Grave

Tanba ne’e, nia dehan, iha momentu halo aprezentasaun bá Orsamentu Jerál Estadu (OJE) tinan 2024 nian, nia foti mós kestaun kona-bá terminal tuan ne’ebé oras ne’e eziste iha Portu Díli inklui uma aat ne’e.

Terminal tuan ne’e ema barak mós hatene katak, fatin ne’e hanesan terminal bá operasun ró ahi nian  iha kedan tempu okupasaun Indonézia no ikus mai hetan estragus barak, tanba ne’e, presiza duni halo rehabilitasaun tanba estraga mós imajen sidade ka fatin públiku ne’ebé dala barak sai sentru vizita bá bainaka importante sira iah fatin ne’e.

Prezidente APORTIL ne’e rekoñese katak, iha tinan hirak liu bá, sira halo duni planu bá rehabilitasaun uma-adat ne’e maibé, la konsege tanba ligadu ho mudansa bá funsaun sira iha Portu Dili nian.

“Tinan ida-ne’e, ita nia atividade bá rehabilitasaun, hotu-hotu halo preparasaun iha ministériu ne’ebá, prossesu iha ne’ebá, APORTIL atu akompaña, koopera hodi bele asegura ezekusaun obra ne’e liu hosi fornesimentu dadus,” Prezidente APORTIL, Feliciano da Costa hateten iha kna’ar fatin, portu antigu Díli, Kuarta (07/02/2024).

Feliciano hatutan, politikamente uma-adat ka terminal antigu ida-ne’e tenke hadi’a duni atu oinsá bele asegura imazen rai doben Timor-Leste nian, tanba bainhira iha tempu ró kruzeiru sira mai vizita Timor, ka seremónia no atividade boboot sira sempre realiza iha fatin istóriku ne’e.

“Ita konsiente ida-ne’e iha dalan protokolu. Entaun, presiza duni atu tau atensaun másimu. Ha’u hanoin, ita nia ministériu ne’ebé mak ami tutela bá mós iha komitmentu, oinsá bele hadi’a ida-ne’e,” nia esplika.

Iha semana rua liubá, APORTIL hetan ona vizita ida hosi na’in bá kompañia kontratór ne’ebé atu halo reahabilitasaun bá obras ne’e no halo ona survei.

“Ho vizita ida ne’e maka no ho baze baze bá despaixu hosi Ministru Transporte no Komunikasaun,  Ministériu Defeza, APORTIL halo kedan koordenasaun ho membru forsa navál sira ne’ebé mak molok ne’e destaka iha uma-adat antigu ne’e. Sira nian ró navál ne’ebé atraka iha portu ne’e mós hahú muda sees ona sira-nian sasán, tanba iha tempu besik, kompañia atu hahú ona prosesu rehabilitasaun,” nia informa.

Entaun, iha koordenasaun ne’e muda sees ona sira na’in hira bá iha espasu balun ne’ebé mak APORTIL fó ho tempu ne’ebé mak limitadu bá sira, no sira muda duni ona bá iha espasu seluk.

Kona-bá kompañia, prosesu sira aprovizionamentu nian, totál orsamentu hira mak aloka bá halo rehabiliatasaun terminal ne’e, Feliciana no da Costa ladun hatene tanba prosesu hotu-hotu, totalmente ne’e ministériu mak responsábiliza.

Hatutan.com tenta ona hodi konfirma asuntu ne’e ho Diretór Jerál iha kna’ar fatin Ministériu Transportes no Komunikasaun (MTK) Caicoli, maibé, la konsege entrevista tanba okupadu hela ho servisu importante seluk.

Jornalista: Rogério Pereira Cárceres