Hatutan.com, ( 13 Fevereiru 2024), Díli—Ministra Saúde (MS), Élia A.A dos Reis Amaral, prontu hatán iha justisa kona-bá keixa ne’ebé submete hosi  Bankada FRETILIN bá Ministériu Públiku.

Lee Mós: Bankada FRETILIN Halo Keixa bá MP Hasoru Ministra Saúde Élia dos Reis Amaral

Ministra Saúde, Elía A.A dos Reis Amaral. Foto/Dok.Hatutan

Ministra Saúde Élia A.A dos Reis Amaral hateten lia hirak-ne’e hodi hatán bá keixa ne’ebé Bankada FRETILIN submete bá Ministériu Públiku (MP) relasiona ho projetu adjudikasaun direta hosi Ministériu Saúde bá empreza nasionál Sali-Magu ho kustu besik US$6,000,000.00 hodi fornese produtu medikamentu no farmaséutika bá Institutu Nasionál Farmásia no Produtu Médiku (INFPM).

Iha Tersa,  06 fulan-Fevereiru 2024, Bankada FRETILIN ne’ebé lidera hosi Xefe Bankada Aniceto Longuinhos Guterres, hatama keixa bá Ministériu Públiku (MP) hasoru Ministra Saúde, Élia A.A dos Reis Amaral, relasiona ho problema stoke out ai-moruk ne’ebé prejudika povu nia vida , inklui prejudika atendimentu públiku iha ospitál ho postu saúde sira iha territóriu nasionál.

Xefe Bankada FRETILIN, Aniceto Longuinhos Guterres, hateten iha keixa ne’e Bankada FRETILIN konsidera Ministra Saúde Élia A.A  dos Reis Amaral nu’udár autora prinsipál iha partisipasaun krime negosíu ekonómiku iha prosesu adjudikasaun direta bá empreza Sali-Magu iha prosesu sosa ai-moruk ho nia valor kontratu besik US$6,000,000.00.  

 Ministra Saúde (MS), Élia A.A  dos Reis Amaral hateten  nu’udár sidadaun  no nu’udár Ministra Saúde prontu ho ho disponibilidade atu hatán iha justisa bá aktu sira ne’ebé mak Bankada FRETILIN akuza.

Bá jornalista sira hafoin partisipa iha reuniaun Konsellu Ministru iha Palásiu Governu,  Tersa (13/02/2024), Ministra Élia Amaral hateten, hanesan membru Governu iha IX Governu Konstitusionál ne’e preokupasaun boot liu mak oinsá halo ezersísiu ho rekursu Ministériu Saúde nian atu responde dezafiu sira, liuliu estoke out ai-moruk ne’ebé Governu anteriór husik hela.

Liga ho Ai-moruk kontentor tolu (3) ne’ebé fornese hosi empreza Sali-Magu to’o agora sidauk distribui bá sentru saúde sira, Ministra Saúde Élia A.A dos Reis Amaral hateten, dau-daun ne’e sei iha faze preparasaun.

“Ita hatene katak ai-moruk to’o iha semana kotuk, sira sei sobu kontentor, sei aruma ai-moruk, ita sei fó tempu ba sira atu nune’e sira halo servisu ne’ebe mak di’ak,” Élia Amaral tenik.

Verifika Hela Ai-moruk Kontentór 3 Hosi Sali-Magu

Hosi sorin seluk, Prezidente R&I Ministériu Saúde, Alípio da Costa, informa ekipa verikasaun, verifika ona ai-moruk kontentor tolu (3) ho medida 40 feet  ne’ebé kompañia Sali-Magu hatama, maibe sei hein Diresaun Nasional Farmasia no Medikamentus (DNFM) hodi mai haree dereita  ai-moruk nia kualidade,  nune’e foin halo distribuisaun bá fasilidade saúde iha teritóriu nasionál.

“Ekipa R&I hosi MS iha ne’e ami na’in tolu ho mós membru nain rua,  iha ne’e halo verifikasaun haree bá kontentór tanba durante ne’e ita hasoru kontentór  40 feet presiza ema barak atu halo verifikasaun tanba item ida deit ezemplu parasetamol ho amoxilin ne’e bead number ne’e barak tebes  kuaze 30 bá leten, ida ne’e ami nain hira deit labele entaun ami bolu fali kolega sira ajuda ami,”  Alípio da Costa  haktuir bá jornalista sira  iha edifisiu  INFPM, Kampu Alor, Díli.

Nia esplika, ai-moruk sira ne’e ekipa verifikasaun sei verifika han tempu to’o semana rua, tanba haree ba ai-moruk nia númeru bead barak, tanba ne’e presiza ekipa verifika ninia data  expire no ai-moruk ninia kuantidade.

Hatan kona ba ai-moruk hira ne’e, tuir duni lista husi Diresaun Aprovizionamentu INFPM  nia responde, antes halo verifikasaun,  ekipa verifikasaun simu lai dokumentus balun husi aprovizionamentu maibe ekipa hare katak ai-moruk refere tuir duni lista aprovizionamentu.

Jornalista:  Leopoldina de Carvalho