Hatutan.com, (15 Fevereiru 2024), Díli- Prezidente Repúblika (PR), José Ramos-Horta, husu atu Ministru Justisa foun, Sérgio de Jesus Fernandes da Costa Hornai atu kontinua tau prioridade ba reforsa setór justisa no dignifika servisu Defensoria Públika.

Lee Mós: PN Husu Ministru Justisa Foun Sergio Hornai Hala’o Knaar ho Responsabilidade

PR Ramos-Horta parabeniza Ministru Justisa foun, Sergio Hornai hafoin fó posse iha Palásiu Prezidensiál, Kinta (15/02/2024). Foto/Elio dos Santos da Costa

Prezidente Repúblika José Ramos-Horta hato’o deklarasaun ne’e bainhira fó pose bá Ministru Justisa Sérgio de Jesus Fernandes da Costa Hornai bá restante mandatu 2024-2028 iha Palásiu Prezidensiál Nicolau Lobato Biaro-Pité, Díli, Kinta (15/02/2024).

Iha diskursu, Prezidente Repúblika José Ramos-Horta hateten ho ksolok fó pose ba Ministru Justisa foun ne’ebé iha karreira brillante iha setór justisa ho dezempeñu di’ak no revela ho funsaun sira antes hanesan defensór públiku no Komisáriu Comissão Anti Corrupção (CAC).

“Setór justisa hanesan pilar ida importante iha estadu direitu demokrátiku. Setór Justisa ida kompetente, idonia, independente, parsiál,  ida ne’e sei halo balansu no ekilibra bá faktu, sirkunstánsia no ne’e sei sai justisa ida verdadeiru bá sidadaun sira,” Prezidente Repúblika José Ramos-Horta afirma.

Xefe Estadu hatutan papél Ministru Justisa nian kabe bá kria kondisaun atu bele apoiu setór justisa, no buat hotu ne’ebé nesesáriu bá administrasaun finansas, infraestrutura, seguransa no servidór justisa hotu sei hala’o funsaun ho previlizidade, trankuilu, ho sira seluk.

Ramos-Horta afirma, Ministériu Justisa tenke bolu mós atensaun boot bá Defensoria Públika ne’ebé sai abut bá setór justisa, no iha país demokrátiku hanesan Timor-Leste ema-ua’in iha interese barak atu serbí iha Defensoria Públika.

Bá Timor Leste ho kondisaun sosiál, ekonómiku país ninian, Defensoria Públika hola pozisaun ida importante, iha kazu barak ne’ebé julga no provavelmente ho rezultadu la justu, presiza tebes Defensoria Públika atu tau matan ho atensaun.

“Ha’u apelu ba Ministru Justisa atu tau atensaun boot bá reforsa, apoiu, no dignifika Defensoria Públika,” Ramos-Horta hateten.

Xefe Estadu dezeju susesu iha Ministru Justisa nia servisu no funsaun foun, onra bá país ne’e, ba ministru sesante sira ne’ebé antes ne’e fó mós dedikasaun iha Ministériu Justisa hodi serbí Estadu direitu demokrátiku.

Ministru Justisa foun, Sergio Hornai simu pose hosi PR Ramos-Horta, Kinta (15/02/2024). Foto/Helio dos Santos da Costa

Ministru Justisa Sérgio de Jesus Fernandes da Costa Hornai,  agradese ba konfiansa tomak husi povu, governu, xefe governu no partidu polítiku sira hotu ne’ebé asentu iha Parlamentu Nasionál no liu-liu partidu Governu nian ne’ebé fo konfiansa hodi indizita nia sai hanesan substitutu bá saudozu maktoban Amândio de Sa Benevides a.

“Ohin ha’u simu responsabilidade ida, la’ós oportunidade. Difisil no iha dezafiu lubuk oan ida ne’ebé  ha’u tenke enfrenta para atu haree kona-ba konsolidasaun estadu direitu Demokratiku iha dezeña politika setór Justisa nian ne’ebé Governu ida ne’e depozita konfiansa para atu hamutuk halo integrasaun ida tantu bilaterál, rejionál no multilaterál iha ita nia rai rasik bá ita nia setór justisa,” Ministru Justisa Sérgio de Jesus Fernandes da Costa Hornai hateten.

Governante ne’e hatutan sei integra bá iha prioridade ne’ebé programa sira halo tiha ona, orsamentu halo tiha ona no nia sei haere ida-idak, kada diresaun, kooperasaun no stakeholder ne’ebé mak Ministériu Justisa halo servisu hamutuk para bele hamutuk konsolida ho vise Ministru justisa no sekretáriu estadu.

“Atu iha reforma justisa nia forma ida mak ita tenke halo artikulasaun bá iha IX Governu Konstitusionál nia politika bá hametin no reforma setór justisa no ida mós mak ba Defensoria Públika,”  Sergio Hornai tenik.

Ministru Justisa ne’e sei tau prioridade ba modernizasaun atendimentu pasaporte no mós halo alargamentu ba prizaun Becora, Gleno no Suai kuandu iha posibilidade bá programa no orsamentu.

Jornalista: Vito Salvadór