Hatutan.com, (15 Fevereiru 2024), Díli – Tribunál Judisiál Primeira Instánsia Díli (TJPID)  liu hosi Juiz Alvaro Maria, Kinta (15/02/2024), lee  akórdaun ka desizaun ikus Tribunál Primeira Instánsia nian ne’ebé aplika pena prizaun efetivu tinan-neen (6) bá antigu Ministru Komérsiu, Indústria no Ambiente  (MCIA), Constâncio Pinto,  bá krime partisipasaun ekonomia no negósiu.

Constâncio Pinto. Foto/Espesiál

Tribunál Judisiál Primeira Instánsia Díli (TJPID)  hola desizaun ne’e tanba faktu sira ne’ebé Ministériu Públika aprezenta iha nia akuzasaun durante  prosesu julgamentu  provadu hotu, katak antigu Ministru MCIA iha VI Governu Konstitusionál ne’e envolve  iha krime partisipasaun ekonomia no negósiu.

Tribunál mós deside hodi plika pena prizaun efetivu tinan-lima (5) bá antigu Diretór Jerál  MCIA António da Costa bá krime hanesan ho nia superiór Constâncio Pinto.

Liu hosi  akórdaun Tribunál mós aplika pena prizaun efetivu tinan-haat (4)  bá empreza na’in empreza Stard Product Unipessoal. Lda, José Deolindo Ximenes no haruka devolve fali osan  Estadu nian  ho montante US$24.000 ne’ebé empreza uza ona.

Advertisement

José Deolindo Ximenes  iha obrigasaun tenke devolve fali osan  ne’e bá estadu iha tinan lima nia laran   tanba aktu ne’e Tribunál  konsidera  fó ona prejuizu bá Estadu Timor-Leste.

Tuir akuzasaun MP nian katak antigu ministru MCIA Constâncio Pinto envolve iha kazu krime partisipasaun ekonomia no negósiu  iha tinan 2016, bainhira sei asume kargu nu’udár Ministru  hodi aprova osan subvensaun públika bá empreza Star Prodact Unipesoál Lda bá projetu resiklajen ne’ebé alínea ho polítika  VI Governu Konstitusionál.

Iha leitura akórdaun Juiz Alvaro hateten, faktu provadu katak  Constâncio Pinto  envolve iha krime partisipasaun ekonomia no negósiu durante hanesan ministru uza podér ne’ebé iha hodi  aprova orsamentu bá empreza Star Product Unipessoal Lda. maibé laiha kontrolu ne’ebé di’ak bá projetu ne’e to’o ikus hamosu prejuizu bá Estadu .

Juiz Alvaro hateten, bazeia bá iha relatóriu  levantamentu  rai ne’ebé  empreza Star Product Unipessoal Lda halo projetu resiklajen ne’ebé lokaliza iha Manleuna, Aldeia Lisbutak katak rai ne’e disputa hela. Maibé, antigu Ministru  Constâncio Pinto lakohi  haree relatóriu ne’ebé ninian subordinadu sira halo ba nia no uza podér hanesan ministru kontinua autoriza empreza Star Porduct  halo projetu inklui halo mós pagamentu bá empreza ne’e.

Nia esplika katak razaun  Tribunál aplika pena efetivu prizaun tinan-neen (6) bá Constâncio Pinto tanba Tribunál entende katak arguido momentu kualidade  hanesan Ministru  MCIA devia rona nia tékniku nia relatóriu ne’ebé  halo liuliu bá  levantamentu  rai ne’ebé empreza uza hodi halo projetu resiklajen ne’e. Maibé, hanesan ministru iha momentu ne’ebá la rona no kontinua avansa selebra kontratu ho empreza Stard Product Unipessoál Lda bá projetu resiklajen inklui autoriza hodi halo pagamentu áa empreza refere.

Advertisement

“Tribunál la’ós haree bá arguido  atu apoia osan subvensaun ne’e, maibé Tribunál entende katak ida kazu, tanba falta kontrolu no kuidadu iha desizaun sira, ikus mai empreza hetan problema bá rai ne’ebé nia halo projetu ba.  Iha ikus  projetu ne’e la kontinua to’o  empreza abandona servisu sira  nune’e osan ne’ebé  Governu apoiu lakon de’it, hodi hamosu  fali prejuizu bá Estadu ida ne’e, ho razaun ida ne’e mak Tribunál laiha duvida hodi hateten aktu arguido nian ne’e prienxe bá elementu krime partisipasaun ekonomia no negósiu,” Juiz Alvaro afirma tan.

 Nia hatutan, ho desizaun ida ne’e Tribunál hakarak  haforsa justisa no nafatin tane justisa signifika justisa la’ós ba ema ki’ik, maibé  Tribunál atu dehan katak justisa ne’e bá ema hotu.

 Juiz Alvaro haktuir razaun Tribunál aplika pena prizaun tinan-lima bá António da Costa tanba momentu ne’e  nu’udár Diretór Jerál MCIA  devia fó  maske nia hatene  maibé arguido lakohi fó  hanoin ba arguido Constâncio Pinto atu trava hahalok hirak ne’e.

“Arguidu António da Costa mós kontribui hodi  husik aktu sira ne’e la’o hodi fó biban ba empreza  Star Product kontinua halo pagamentu bá empreza ne’e to’o ikus empreza la konsege finaliza projetu resiklajen no hamosu fali prejuizu mai estadu,” Juiz Alvaro tenik.

Razaun  Tribunál aplika pena efetivu prizaun  tinan-haat (4) bá krime Administrasaun danoza bá José Deolindo Ximenes, tanba arguido nia hahalok ne’e nia hatene hela katak rai ne’ebé nia okupa hodi halo projetu resiklajen ne’e iha hela problema, maibé arguido kontinua halo pedidu bá MCIA atu pagamentu bá projetu resiklajen tanba nia  halo servisu .

Advertisement

“projetu ne’e to’o ikus paradu no la kontinua tanba rai ne’ebé empreza Star Product Unipessoal halo projetu resiklajen  iha Manleuna iha hela problema. Haree ba sirkunstánsia sira ne’e Tribunál  laiha duvida  aplika pena  efetivu prizaun tinan-haat bá José Deolindo Ximenes,” nia konklui.

Akuzasaun ne’ebé arrola hosi Ministériu Públiku katak iha loron 19 fulan-Janeiru tinan 2016, no mós iha loron 09 fulan-Agostu tinan 2016, arguido Jose Deolindo Ximenes hato’o tiha ona pedidu husu apoiu orsamentu ho montante $200,000.00, hodi hala’o prosesu produsaun resiklajen ne’ebé tuir planu sei lokaliza iha Aldeia Lesibutak, suku Manleuana, Postu Administrativu Dom Aleixo, Munisípiu Díli.

Arguido Jose Deolindo Ximenes hato’o pedidu refere bá iha ministru MCIA  altura ne’ebá arguido Constâncio da Conceição Pinto nia podér. no iha loron 26 fulan-Agostu tinan 2016 arguido Constâncio Pinto, hatuun despaxu bá pedidu apoiu finansas hato’o hosi arguido Jose Deolindo Ximenes, gabinete komérsiu haruka ekipa ida ba halo verifikasaun no rekomenda mai hodi halo aprovasaun.

Diretór jerál CAEP Manuela G.B. Corte Real hasai despaxu hodi nomea ema na’in 11 hodi hala’o verifikasaun bá prosesu industria resiklajen bá lixu plástiku. Maibe ikus mai deteta katak, saida maka halo la tuir nia prosesu no regra ne’ebé iha.

Husi hahalok hirak ne’ebé arguido Antonio da Costa, arguido Jose Deolindo Ximenes no arguido Constâncio da Conceição Pinto  (eis ministru MCIA) hamosu prejuizu bá orsamentu estadu ho montante US$462,000.00, montante orsamentu refere mai hosi total orsamentu fundus subvensaun publika ne’ebé fó bá kompañia refere ho valor $289,000.00, inklui kompañia ida 10% durante fulan-neen (6) hahú hosi fulan-Janeiru too fulan-Juñu 2018 ho valor US$28,900.00 no  fulan-neen (6) hamutuk US$173,400.00.

Advertisement

arguido Constâncio da Conceição Pinto no arguido Antonio da Costa hatene katak, sira nia hahalok nee kontra ona regra ezekusaun fundus subvensaun públiku no sira hatene katak, fundus refere labele fó ba pesoál koletivu lukrativa mézmu hanesan nee, arguido sira kontinua fó aprovasaun no mós asina kontratu hodi entrega projetu refere bá arguido Jose Deolindo Ximenes nu’udár diretór kompañia Star Product unipesoal, Lda.

Fundus subvensaun públiku tenke mós uza prosesu aprovizionamentu,  maibé arguido Constâncio Pinto no arguido Antonio da Costa adjudika direita bá kompañia Star Product Unipessoal, Lda  ho finalidade lukrativa.

Arguidu Jose Deolindo Ximenes nu’udár diretór kompañia Star Product Unip, Lda. hatene katak, nia la merese bá fundus subvensaun publiku, no nia mós hatene katak,  rai ne’ebé maka nia utiliza atu hala’o produsaun refere iha hela disputa, mézmu hanesan nia kontinua solisita fundus subvensaun públiku no kuandu nia simu fundus refere nia kontinua utilize justifikasaun ne’ebé hanesan de’it hodi husu tan estadu hodi halo pagamentu.

Arguido Jose Deolindo Ximenes nu’udár diretór kompañia Star Product Unip, Lda,  hakarak hanesan hato’o sempre servisu ne’ebé maka nia hala’o ona  no mós kontinua husu tan fundus benefisia nia an, hodi hato’o falsamente iha relatóriu utilizasaun fundus subvensaun públiku, mézmu nia rasik hatene katak projetu refere paradu dezde tinan 2016 to’o 2018 tanba problema rai.

Arguido sira halo aktu refere ho livre deliberada hatene katak , hahalok refere, lei bandu no aktu refere krime, maibé sira hakarak fó vantajen bá malu hodi prejudika Estadu.

Advertisement

Ho faktu refere arguido sira hanesan, Constâncio da Conceição Pinto hanesan autór material bá krime partisipasaun ekonomia ne’ebé previstu iha artigu 299 husi kódigu penal, no arguido Antonio da Costa nu’udár autór material bá krime partisipasaun ekonomia artigu  299 husi kódigu penal, no arguido Jose Deolindo Ximenes nu’udár autór material bá krime administrasaun da nossa ne’ebé previstu iha artigu 274 husi kódigu penal.

Audiénsia julgamentu ne’e, preside husi juis Alvaro Maria, José Gonçalves, Arjentino Nunes, MP reprezenta husi prokuradoria Lidia Soares, arguido hetan asisténsia legal husi Advogadu Privadu no Defensor Públiku. 

Jornalista Estajiáriu:  Lazaro Pereira Quefi

Advertisement