Hatutan.com, (25 Fevereriu 2024), Abu Dhabi– Iha ámbitu konferénsia interministeriál dala-13 ne’ebé hala’o iha Sentru Espozisaun Nasional Abu Dhabi (ADNEC), Abu Dhabi, Emiradus Arabes Unidus (EAU), hosi loron  26 to’o 29 Fevereiru 2024, iha mós sesaun Konferénsia Parlamentar ida kona-bá Organizasaun Mundial Komérsiu nian (OMK).

Lee Mós: Timor-Leste Partisipa “Chinese Roundtable Meeting” Nu’udár Faze Preparasaun Adere bá OMK

Konférensia Parlamentál iha Abu Dhabi, Domingu (25/02/2024). Foto/Rogério Pereira Cárceres

Sesaun ida-ne’e organiza hosi Uniaun  Interparlamentar (UIP) no Parlamentu Europeu (PE) mak lidera Konferénsia Parlamentár  OMK nian.

Jornalista Hatutan.com, Rogério Pereira Cárceres hosi Abu Dhabi relata katak  reuniaun ne’e nu’udár  mekanizmu permanente ne’ebé kontribui hosi parlamentár entre órgaun  intergovernamentál.

Advertisement

Konferénsia ne’e mós nu’udár reúne lejisladór hosi  komisaun  permanente sira ne’ebé espesializa bá asuntu komérsiu no finansas internasionál.

Prinsípiu no  objetivu hosi konferénsia ne’e mak atu  mobiliza asaun parlamentár hodi  apoiu  promosaun komérsiu  globál ho ninia benéfisiu bá ema hotu.

Prezidente Parlamentu Nasionál (PPN), Maria Fernanda Lay, ihateten konferénsia parlamentár ne’e, sira ne’ebé mak dadaun ne’e diríje hela organizasaun mundial komérsiu ne’e, hato’o katak, iha servisu barak mak sira hotu tenke halo.

“Automatikamente, liga ho agrikultura, liga ho lei sira ne’ebé parlamentu tenke halo, no mós ita nia adezaun,” Prezidente Parlamentu Nasionál Maria Fernanda Lay, informa bá jornalista sira, hafoin konferénsia Parlamentár  iha salaun 10, Sentru Espozisaun Nasional Abu Dhabi (ADNEC), Abu Dhabi, Emiradus Arabes Unidus (EAU), Domingu (25/02/2024).

Durante iha sesaun ne’e, Timor-Leste  seidauk bele pozisiona pozisaun ruma, tanba foin mak atu adere. Maibé, automatikamente, iha enkontru, sira sei fó oportunidade.

Advertisement

Prezidente Parlamentu Nasionál, Maria Fernanda Lay. Foto/Rogério Pereira Cárceres

“Ohin, sira mós husu, para ami rejista, sé atu hakatak hato’o buat ruma, maibé, ami la rejísta, tanba foin mak ita tama no  matéria saida mak ami sei tau matan uluk, ida ne’e mak importante bá ita. Konserteza, iha enkontru sira tuir mai, ita iha posibilidade atu intervein para husu saida mak ita hakarak,” Maria Fernanda Lay hateten.

Iha kontestu sira bá preparasaun nian, la’os Parlamentáres de’it, maibé mós iha ezekutivu sira, no mós asesória saida mak Timor-Leste presiza, atu nune’e, membru antigu sira OMK nian bele apoia deputadu sira, liu-liu iha sira-nia papél hanesan parlamentár durante debate sira akordu nian ho tratadu sira ne’ebé tenke aprova iha parlamentu.

Iha konferénsia parlamentár ne’e, Banku Sentrál Timor-Leste ho Ministériu Agrikultura, koalia mós kona-bá fixa subsidies, ne’ebé mak foin lalais submete tiha ona bá parlamentu, maibe tanba PN seidauk sai membru OMK, nune’e, labele lai aprova TL nian tratadu ida ne’e.

Delegasaun Parlamentu Nasionál  Timor-Leste nian ne’ebé partisipa iha Konferénsia Parlamentár ne’e mak, Prezidente Parlamentu Nasionál, Maria Fernanda Lay, Segundu Vise PPN, Alexandrino Afonso Nunes, Sekretária Meza Virgínia Ana Belo, inklui Xefe bankada CNRT, Xefe Bankada PD, Xefe Bankada FRETILIN, Xefe Bankada KHUNTO ho Xefe Bankada PLP.

Sesaun Konferénsia Parlamentár ne’e sei realiza anualmente iha ámbitu ho Konferénsia Ministeriais Organizasaun Mundiál bá Komérsiu nian. ***

Advertisement