Hatutan.com, (27 Fevereiru 2024), Díli—Deputada Nurima Ribeiro Alkatiri preokupa ho númeru dezempregu ne’ebé sa’e makaas iha Timor-Leste (TL) rezulta joven barak tenke sai nafatin bá buka servisu iha rai-li’ur.

Deputada bankada FRETILIN Nurima Ribeiro Alkatiri. Foto dok privada Nurima.

Deputada ne’e preokupa tanba tuir nia, problema boot ne’ebé Timor Leste hasoru maka dezempregu ka falta kampu traballu, liu-liu joven sira.

Lee Mós: 2023, Governu Haruka Traballadór Timoroan 5.474 bá Servisu Iha Austrália-Korea-Japaun

“Ita iha dadus hosi peskiza forsa traballu ne’ebé halo iha tinan 2021 survei ida-ne’e halo hosi Ministériu Finansas ho ILO. Rezultadu hatudu katak, totál dezempregu iha Timor-Leste 5.1%. Katak, iha problema ida-ne’e ita presiza tau atensaun,” Nurima Ribeiro Alkatiri levanta preokupasaun ne’e iha plenária, Tersa (27/02/24).

Iha peskiza ne’e hatudu katak, hosi totál ema 12.000 ne’ebé klasifika hanesan dezempregadu, taxa iha nível makaas liu ho 5,9% kompara ho mane sira 4,6%, no joven sira entre idade 15 no 24 maka aas liu 9,6% kompara ema ho idade 25 to’o 64 idade ho 4,7% nomós ho ema sira idade 65 idade bá leten ho 2,3%. 

Tanba ne’e, nia husu Governu atu esplika programa no politika saida mak sira atu implementa hodi bele  ajuda rezolve problema ida-ne’e.

“Realidade agora joven barak buka sai bá rai-li’ur, tanba iha rai laran rasik la konsege hetan servisu. Maibé, ha’u louva joven sira ne’ebé buka atu sai tanba sira halo esforsu nafatin buka moris ne’ebé dignu bá sira nomós sira nia familia,” nia hateten.

Deputada ne’e husu nafatin bá Estadu ne’ebé iha devér atu kria kondisoens atu maluk Timoroan sira la presiza sai tán, hodi bele moris iha sira nia rai rasik ho dignu atu bele hetan sira nia diretu bá empregu atu bele kontinua moris ho feliz ho sira nia familia iha sira nia rain rasik.

Kona-bá preokupasaun ne’e, Vise-Ministru Asuntu Parlamentár, Adérito Hugo da Costa hateten, kesatun dezempregu, Governasaun ida-ne’e mai ho kedan ninia kompromisiu iha programa IX Governu nian atraves Orsamentu Jerál Estadu (OJE) 2024.

Tanba Governu ida mai ho ninia orsamentu kada tinan ne’ebé hateten ona oinsá atu kria kampu traballu bá jorven sira hodi redúz ki’ak, redusaun pobreza, kresimentu ekonómiku ne’e pontu 3 importante iha kualkér orsamentu ne’ebé Governu  investe iha OJE 2024.

“Mai mós ho ninia metas atu implementa hodi kriá kampu traballu hira no redúz pobreza halo nusa, kresimentu ekonómiku atu hasa’e to’o persetajen hira. Ne’e iha IX Governu ninia kompromisiu bá tinan lima, nune’e mós bá orsamentu 2024 iha dokumentu ita haree klaru teb-tebes atu kriá kampu traballu,” Adérito Hugo hateten.

Jornalista Estajiária: Zita Menezes