Hatutan.com, (27 Fevereiru 2024), Abu Dhabi—The Enhanced Integrated Framework (EIF) komprometidu atu kontinua fó apoiu bá Timor-Leste (TL) iha Organizasaun Mundial Komérsiu (OMK). 

Diretór ezekutivu The Enhanced Integrated Framework (EIF), Ratnakar Adhikari hala’o enkontru ho, Vise Primeiru Ministru, Francisco Kalbuadi Lat, iha Sentru Espozisaun Nasionál Abu Dhabi (ADNEC), Tersa (27/02/2024). Foto: Rogério Pereira Cárceres.

Kompromísiu ne’e haktuir hosi Vise-Primeiru Ministru, Ministru Koordenadór bá Asuntus Ekonómikus, Ministru Turizmu no Ambiente, Francisco Kalbuadi Lay hafoin enkontru ho diretór ezekutivu The Enhanced Integrated Framework (EIF), Ratnakar Adhikari, iha Salaun 6, iha ámbitu konferénsia ministerial dala-13 ne’ebé hala’o iha Sentru Espozisaun Nasionál Abu Dhabi (ADNEC), Abu Dhabi hosi 26 to’o 29 Fevereiru 2024.

Lee Mós: TL Ofisialmente Sai Membru Plenu iha OMK

“Ida ne’e tanba sira durante ita nian prosesu iha WTO, sira iha ekipa ki’ik ida ne’ebé maka hetan apoiu hosi sira. Sira mai ohin, deklara de’it dehan sira kontinua apoia iha futuru,” Francisco Kalbuadi Lay, hateten iha Sentru Espozisaun Nasionál Abu Dhabi (ADNEC), Tersa (27/02/2024).

EIF nu’udár institutu sentrál ida-ne’ebé fornese programa formasaun alvu sira ne’ebé foka liu bá tópiku no papél xáve sira.

EIF sai nu’udár fornesedór formasaun ida-ne’ebé lidera atu alkansa objetivu sira hosi ajenda Emiratizasaun nian, ho planu bá tempu naruk atu oferese programa auto-sertifikasaun hodi estabelese referénsia rejionál ida.

EIF ninia papél ida tán maka fasilita espesialista servisu finanseira klase mundiál sira liuhosi kapasitasaun, estabelesimentu padraun no promove inovasaun iha seitór finanseira.

EIF inisialmente estabeleidu iha Outubro tinan 1997, iha Reuniaun Altu Nível kona-bá Dezenvolvimentu Komersiál hosi nasaun dezenvolvidu sira ne’ebé realizada iha OMK.

Enkontru Bilaterál ho Austrália

Vise-Primeiru Ministru, Francisco Kalbuadi Lay realiza enkontru ho Ministru Komérisiu no Turizmu Austrália nian, Don Farrel iha Sentru Espozisaun Nasionál Abu Dhabi (ADNEC), Tersa (27/02/2024). Foto: Rogério Pereira Cárceres.

Hafoin sorumutu ho ezekutivu sira EIF nian, iha biban hanesan Vise Primeiru-Ministru, Francisco Kalbuadi Lay realiza mós enkontru ida ho Ministru Komérisiu no Turizmu Austrália nian, Don Farrel no nia asistente ministru bá komériu nian hodi hametin liután relasaun país rua ne’e nian bá oin.

“Ohin enkontru ha’u ho ministru na’in hira iha ne’e. Hasoru malu ho ministru komérsiu no turizmu Australia nian, ne’e hanesan bilateral meeting ida atu kontinua ita-nia relasaun entre Timor-Leste, diskute sobre mós iha future saida mak Australia atu servisu hamutuk hodi hametin liu relasaun nasaun rua ne’e liu-liu post-assecion bá iha WTO nian, atu Austrália bele mós servisu hamutuk ho ita no apoia nafatin, téknikamente hosi Austrália mai ita,” Kalbuadi Lay, informa.

Iha enkontru bilaterál rua ne’e, vise primeiru-ministru, hetan mós akompañamentu hosi Vise Ministru Komérsiu no Indústria (MCI-Sigla Português), Augosto Junior Trindade, Ministru Agrikultura no Peskas (MAP), Marcos da Cruz, Ministru Transporte no Komunikasaun (MTK), Miguel Manetelo, Vise Ministra bá Asuntu Association of South East Asean Nation (ASEAN), Milena Rangel, Sekretáriu Estadu Komunikasaun Sosial (SEKOMS) Expedito Dias Ximenes, Embaixadora TL nian bá Zenebra, Lurdes Bessa, inklui ekipa tékniku sira bá asuntu adezaun TL iha OMK.

Jornalista: Rogério Pereira Cárceres