Hatutan.com, (29 Fevereiru 2024), Díli—Parlamentu Nasionál (PN) liohosi reuniaun líder bankada ne’ebé sira lidera hosi Vise Prezidente Parlamentu Nasionál Teresinha Viegas ho vise-bankada sira iha Kinta (29/24/2024) deside ona ajenda bá eleisaun Komisáriu foun Comissão Anti Corrupção (CAC) ne’ebé sei akontese iha semana oin entre Segunda ka Tersa (05/03/2024).

“Ohin ami reuniaun lider bankada no deside halo ajenda  katak Segundu ka Tersa sei halo eleisaun bá komisáriu CAC,” Sekretária Meza PN, deputada Maria Teresa Gusmão hateten iha PN, Kinta (29/02/2024).

Lee Mós: Governu Submete Ona Lista Rui Pereira bá Kandidatu Komisáriu CAC

Desizaun atu halo eleisaun iha semana oin ne’e tanba bankada boot rua iha PN hanesan CNRT ho FRETILIN iha ona konsensu.

“Sim iha ona konsensu entre bankada CNRT ho FRETILIN. Tanba ne’e maka, entre Segunda ka Tersa sei halo konvokatóriu hodi halo oráriu. Fixu loron rua ne’e atu bele halo eleisaun bá komisáriu CAC,” nia hateten.

Vise bankada FRETILIN deputada Maria Angelica Rangel haktuir, reuniaun lider bankada iha ajenda lubuk ida maka halo diskusaun hodi deside liu-liu kona-bá ajendamentu komisáriu CAC hodi hakat bá eleisaun.

“Agora daudaun lidér bankada no Prezidente bankada sira sei iha hotu rai li’ur, tanba ne’e maka ohin vise bankada sira mak tuir enkontru,” nia hateten.

Tuir nia, depois de reuniaun líder bankada, nia sei lori fila-fali mai iha bankada hodi halo fali reuniaun depois sei halo desizaun bá ajenda eleisaun komisáriu CAC.

Jornalista Estajiária: Zita Menezes