Hatutan.com, (06 Marsu 2024), Díli—Primeiru-Ministru (PM), Kay Rala Xanana Gusmão husu atu empreza Woodside respeita direitu Timoroan nian hodi dada kadoras Greater Sunrise mai Timor-Leste (TL).

Primeiru-Ministru (PM), Kay Rala Xanana Gusmão ho ekipa hala’o enkontru ho CEO Kompaña Woodside, Meg O’Neil hodi husu atu kompañia kontinua respeita direitu povu Timor-Leste hakarak dada plantasaun kadoras greater sanrise mai Timor-Leste. Foto: Média GPM.

Kay Rala Xanana Gusmão hato’o assuntu ne’e bainhira hala’o enkontru ho CEO Kompaña Woodside, Meg O’Neil hodi husu atu kompañia kontinua respeita direitu povu Timor-Leste hakarak dada plantasaun kadoras greater sanrise mai Timor-Leste.

Lee Mós: Governu Sei Re-estabelese Negosiasaun ho Austrália Asegura Kadoras GSR Mai Timor-Leste

Xanana husu ne’e tanba Governu Timor-Leste mós respeita nafatin Woodside ninia direitu hodi hala’o esplorasaun ba projetu mina rai no gás iha plantasaun Greater Sanrise.

“Hasoru-malu ho Woodside ami ko’alia liu kona-bá kooperasaun ne’ebé la’o ona. Ha’u informa ba sira no sira mós hatene katak, Ministru Petróliu no Rekursu Minarais, Francisco Monteiro iha hela Perth-Austrália no iha asuntu balun sei kontinua ko’alia bá malu. Ha’u husu de’it maka Woodside loke luan oituan imi nia hanoin, ita ko’alia bá malu respeita malu. Ami respeita imi  nia interese no imi mós tenki respeita ami nia interese hodi dehan ba sira katak, buat ida kadoras atu dada mai Timór ne’e. Ne’e ami nia prinisipiu boot tebes ida dezde kedan funu,” Hatutan.com sita deklarasaun  Primeiru-Ministru Kay Rala Xanana Gusmão iha komunikadu.

Xefe Governu hatutan, luta povu Timor-Leste nian ba fronteira maritima permanente manán ona, tanba ne’e Ministru Petroliu no Rekursu Minarais (MPRM), Francisco Monteiro kontinua servisu makas hodi koordena nafatin ho kompañia Woodside komisaun tomak ne’ebé involve iha prossesu atu diskute asuntu ne’e ho kle’an liu tán.

Durante enkontru, CEO Woodside Meg O’Neil agradese ba Xefe Governu Xanana Gusmão ne’ebé kontinua tau fiar atu servisu hamutuk.

Kompañia Woodside mós komprometidu  atu servisu hamutuk nafatin ho Governu Timor-Leste hodi hala’o esplorasaun bá projetu minarai iha plantasaun Greater Sanrise.

Antes ne’e, PM Xanana mós hala’o enkontru ho reprezentante espesiál Governu Austrália ba Negosiasaun no Dezenvolvimentu Greater Sunrise, Steve Bracks hodi deskute dezenvolvimentu projetu Greater Sanrise ne’ebé sei muda konseitu dezenvolvimentu rai rua bá futuru.

Timor-Leste no Austrália mós sei hapara diverjénsia hotu-hotu iha pasadu, atu nune’e povu rua, Australianu no Timor oan, bele haree futuru relasoins iha konfiansa boot no respeitu mútua ne’ebé boot liu.

Jornalista: Vito Salvadór