Hatutan.com, (07 Marsu 2024), Díli—Konsellu Imprensa Timor-Leste (CI, sigla portugés) ajenda ona atu iha tempu badak pronúnsia bá públiku kona-bá Sekretária Estadu Komunikasaun Sosial (SEKOMS) ne’ebé halo plájiu ka copy-paste planu estratéjiku CI  2022-2026 hodi ajusta iha ninia planu estratéjiku SEKOMS  2024 to’o 2028.

Prezidente Konsellu Imprensa Timor-Leste, Otélio Ote.

Prezidente Konsellu Imprensa Timor-Leste , Otélio Ote, hateten, plenária CI nian hatene tiha ona kona-bá asuntu plájiu bá Planu Estratéjiku CI nian no hatún ona despaxu bá parte ezekutiva CI nian, liuliu Diresaun  Análize no Dezenvolvimentu  Mídia (DDAM) hodi halo levantamentu no konfirmasaun bá livru Planu Estratéjiku CI nian ne’ebé SEKOMS  kopia hodi halo fali Planu Estratéjiku SEKOMS nian.

Lee Mós: Plájiu, Di’ak Liu SEKOMS Rekoñese Sala Husu Deskulpa

Bá Hatutan.com iha edifísiu Konsellu Imprensa, Kintal-Boot, Díli, Kinta (07/03/2024), Otelio Ote hateten,  parte jurídiku nian halo hela servisu no tuir ajenda, iha Sesta aban (08/03/2024),  liuhosi  plenária CI sei halo diskusaun bá rezultadu análize ne’ebé DDAM submete hodi haree grau plájiu ne’e.

“Liuhosi análize ne’e mak fó prova katak SEMOMS halo duni plájiu bá livru planu estratéjiku CI nian tomak ka plájiu parte balu de’it ka plájiu iha nia konteúdu ida, ami rona ida-ne’e, depois ami sei halo deklarasaun ida ofisial bá públiku, kona-bá asuntu ida ne’e,”  Prezidente CI, Otelio Ote, hateten hafoin fasilita formasaun bá ofisial média sira Governu nian, iha salau CI. 

Otélio afirma CI nia pozisaun liuhosi deklarasaun sira tuir mai, klaru katak, CI ho SEKOMS kontinua servisu atu mantein servisu di’ak entre ministerial, tanba Konsellu Imprénsa mós órgaun Estadu no SEKOMS mós órgaun Estadu nian.

“Ita buka atu armoniza testu sira-ne’e, ho modelu saida. Pore-zemplu, sé akontese duni iha plájiu, depois ami sei fó ami nia resposta no rekomendasaun sira bá SEKOMS kona-bá asuntu ida-ne’e,” Otélio Ote hateten tan.

Prezidente CI ne’e mós salienta katak, nia parte halo tiha ona leitura bá dokumentu rua ne’e, no sira identifika ona saida-saida mak iha plájiu. Maske nune’e, presiza liuhosi mekanizmu legál ruma molok CI halo deklarasaun públiku.

Membru Konsellu Imprensa ne’ebé eleitu hosi na’in bá mídia sira-ne’e mós informa katak, besik semana rua ona, ekipa ezekutivu no jurídiku  CI nian halo análize bá dokumentu rua kona-bá planu estratéjiku SEKOMS ho CI nian.

Iha ámbitu formasaun bá ofisial média sira Governu nian, iha salaun CI mosu mós preukupasaun hosi ofisial mídia balu, kona-bá aktu plájiu ne’ebé SEKOMS halo, tanba konsidera problema sériu iha mundu akadémia no sientífiku nian.

diretór Diresaun  Análize no Dezenvolvimentu  Mídia (DDAM), Alberico da Costa Junior.

Iha ambitu diskusaun ne’e, diretór Diresaun  Análize no Dezenvolvimentu  Mídia (DDAM), Alberico da Costa Junior, hatán katak, ekipa apoiu jurídiku sira CI nian halo tiha ona levantamentu, no enkamiña ona bá Gabinéte Diretór Ezekutivu atu bele submete bá plenária CI nian.

“Kona-bá plájiu ne’e, ami nia ekipa halo ona levantamentu bá ida-ne’e, depois, horseik kedas, ami haruka ona rezultadu ne’e bá Diretór Ezekutivu atu submete  plenária atu foti desizaun,” Alberico da Costa Junior hateten.

Iha Tersa, 05 fulan-Fevereiru 2024, Hatutan.com hakat to’o gabinete Sekretáriu Estadu Komunikasaun Sosiál (SEKOMS), Expedito “Loro” Dias Ximenes hodi halo konfirmasaun bá asuntu plájiu ne’e, la kohi atu halo entrevista no Sekretáriu Estadu  rasik lia-tun de’it bá nia asesór Noémio Falcão hodi hato’o bá jornalista Hatutan.com katak SEKOMS la fó komentáriu lai tanba atu halo de’it Direitu Resposta.

Iha loron tuir mai, Kuarta horiseik, jornalista Hatutan.com hasoru SEKOMS Expedito “Loro” Dias Ximenes atu halo entrevista doorstop hafoin halo abertura formasaun polítika ASEAN bá jornalista sira iha Otél Novo Turizmu, maibé  tempu okupadu no urjente bá servisu importante hodi la bele atende entrevista ho jornalista sira.

Plájiu Nu’udár Aktu Violasaun bá Lei

Renato da Costa.

Hosi sorin seluk, Renato da Costa, nu’udár observadór mídia fó nia opiniaun katak plájiu nu’udár aktu violasaun bá  Lei  no konfiansa públiku nian.

Renato da Costa hateten, plájiu la’ós de’it kauza ka preokupasaun akadémika ka lapsu kona-bá étiku. Ida-ne’e klaru kedas nu’udár hahalok ne’ebé viola lei.

Hahalok plájiu, Renato da Costa fundamenta tan, nu’udár hahalok infantil ne’ebé hamosu kestaun ua’in kona-bá integridade ho nia responsabilizasaun.

Nia fó analojia kona-bá hahalok infantil katak bbainhira oan sira gosta sasán ema seluk nian, sira obriga nia inan-aman tenke sosa sasán ho modelu no tipu hanesan. Tamba sasán orijen ne’e karun, inan-aman bá sosa fali ida folin baratu ho modelu hanesan. Ninia konsekuénsia mak oan sira uza la kleur de’it, sasán ne’e sai at tiha.

Entermu hahalok ne’e, Renato tenik tamba pur neglijénsia, ninia verdade fundamental permanese tiha ona, katak plájiu ne’e ilegal. Hola sasán imitasaun ne’e la dura no la di’ak. Mais fara, instituisaun Estadu ne’ebé asume papel hodi sai modelu ka ezemplár no sai vanguarda hodi respeita direitu kona-bá propriedade intelektual nian, maka komete fali hahalok hirak ne’e.

“Konsekuénsia hodi halo plájiu ninia efeitu boot tebes. Tamba plájiu ne’e nu’udár hahalok ne’ebé estraga integridade ema seluk nia serbisu, prejudika konfiansa públiku. Iha sosiedade ne’ebé harii ho baze no prinsípiu justisa no respeita ema seluk nia kriatividade, hahalok plájiu nunka bele tolera,” Renato da Costa afirma iha nia komentáriu.

Jornalista: Rogério Pereira Cárceres