Hatutan.com, (12 Marsu 2024), Díli—Bankada Partidu Libertasaun Populár (PLP) konsidera bankada CNRT ho FRETILIN iha Parlamentu Nasionál (PN) mak laiha seriedade atu hili Komissáriu foun Comissão Anti Corrupção (CAC), maski kandidatu iha ona.

Xefe Bankada PLP, deputada Maria Angelina Sarmento dúvida ho seriedade bankada FRETILIN ho CNRT ne’ebé to’o ohin loron seidauk ajenda eleisaun ne’e maski Governu submete ona kandidatu úniku Rui Perreira iha semana hirak liu bá.

Lee Mós: Eleisaun Komisáriu CAC Kanseladu Tanba La Prienxe Kuorum

“Desde inísiu kedan ami dúvida tebes ho seriedade bankada boot-rua ne’e atu promove boa governasaun no transparénsia liu hosi eleze no nomeia instituisaun sira ne’ebé tutela atu hala’o knaar hodi prevene no kombate korrupsaun iha ita nia rai,” deputada Angelina Sarmento hateten iha PN, Tersa (12/03/2024).

Dúvida seluk maka, iha semana kotuk anunsia ona kona-bá eleisaun ne’e maibé realidade deputadu sira la prienxe kuorum.

“Ami mós la hatene no nu’udár bankada ki’ik hein de’it meza atu enkamiña ajenda ida-ne’e bá oin. Espera sei iha desizaun ida ne’ebé mak di’ak bá kandidatu sira atu bele iha serteza bá insituisaun CAC bainhira iha nia lideransa másimu atu assume responsabilidade iha instituisaun ne’e hodi hala’o servisu sira ligadu ho kompeténsia sira ne’ebé lei fó bá CAC,” nia subliña.

Iha fatin hanesan Xefe bankada CNRT, Duarte Nunes hateten, asuntu ne’e bankada CNRT ho FRETILIN ko’alia ona, maibé bankada FRETILIN husu fó tempu atu sira halo lai reuniaun bankada hodi hola desizaun, depois mak sei fó informasaun bá Prezidente Parlamentu Nasionál Maria Fernanda Lay, atu tau ajenda bá semana oin.

“Atu halo konsensu ne’e mak sira tenke konsolida hotu antes sira atu bá reuniaun, depois mak hosi rezultadu konsensu,” nia hateten.

Deputadu ne’e mós dehan katak, kona-bá opinaun hosi sosiedade sivil no mós jurista sira ne’e husik bá, di’ak liu Parlamentu Nasionál ko’alia bá malu no intende bá malu atu hotu-hotu simu nia rezultadu ho sira nia servisu ne’ebé mak sira halo.

“Lae mak ita duun bá malu, ne’e sira nian, ne’e ami nian, ka ne’e ida-ne’e nian, orsida laiha benefísiu ba ita nia rai,” nia haktuir.

Jornalista tenta halo entrevista mós ho xefe bankada FRETILIN, deputadu Aniceto Guterres relasiona ho assuntu ne’e maibé lakohi fó komentáriu.

Jornalista Estajiária: Zita Menezes