Hatutan.com, (18 Marsu 2024), Dilí—Deputadu bankada CNRT, Gabriel Soares iha Parlamentu Nasionál (PN) kestiona uma-ka’in 70 ne’ebé dada ahi eletrisidade ilegál iha suku Abeon, Postu-Administrativu Barique, munisípiu Manatuto.

Tékniku EDTL,E.P hadi’a liña distribuisaun eletrisidade. Foto/Dok.Hatutan.com

Durante intervenzaun plenária iha Segunda (18/03/2024), deputadu Gabriel Soares husu bá parte Eletrisidade Timor Leste Empreza Públika (EDTL,E.P) atu halo inspesaun sériu, nune’e bele kontrola atu labele fó prezuizu bá Estadu.

Lee Mós: EDTL, E.P Tenke Kontrola Másimu Ligasaun Ilegál

“Husu EDTL,E.P hanesan empreza públiku atu halo kontrolu másimu bá iha kliente sira tanba dalaruma ita haree katak sei iha individu ida ka rua mak sei dada hela ahi eletrisidade illegál. Hanesan publikasuan iha média sosiál virál tebes iha ha’u nia munisípiu Manatuto rasik iha postu administrativu Barique iha suku naran Aubeon kuazé iha setenta uma-ka’in mak la’o hela ho aktu dada ahi illegal,” nia hateten.

Reprezentante povu ne’e konsidera aktu dada ahi illegal ne’e fó prejuizu boot  bá Orsamentu Jerál Estadu (OJE),  tanba ne’e EDTL,E.P hanesan empreza Estadu nian husu atu halo kontrolu másimu.

Kona-bá preokupasaun ne’e, Vise-Ministru Asuntu Parlamentár, Adérito da Costa Hugo hateten, assuntu eletrisidade ne’e Governu sei submete bá iha parte EDTL,E.P hodi haree no buka solusaun.

Jornalista Estajiária: Zita Menezes