Hatutan.com, (19 Marsu 2024), Díli—Parlamentu Nasionál (PN) liu hosi deputadu Patrocinio Fernandes, husu membru Governu sira atu redús viazen bá rai-liur tanba problema iha rai laran sei barak no presiza tebes atu rezolve.

Prezidente Komisaun A PN, Patrocinio Fernandes. Foto/Tome da Silva

Deputadu hosi bankada CNRT husu ne’e tanba deputadu sira sempre levanta problema povu nian barak tebes ne’ebé presiza duni atensaun hosi IX Governu Konstitusionál.

Lee Mós: Alterasaun Lei Pensaun Vitalísia, Inisiativa Tenki Mai Hosi Deputadu Sira

“Ha’u nu’udár deputadu  ida de’it, ha’u husu bele karik membru Governu sira iha tinan 2024 tahan no pondera oitoan vizita sira sai bá liur hodi konsentra rezolve problema povu nian ne’ebé Segunda no Tersa deputadu sira foti iha plenária,” deputadu Patrocínio Fernandes hateten iha plenária, Tersa (19/03/2024).

Reprezentante povu ne’e haktuir, Orsamentu Jerál Estadu (OJE) tinan 2024, ko’a makaas ne’e 50% hasai bá viazen ne’ebé membru Governu sira halo bá estranjeiru.

“Tanba ne’e lakleur rona Sekretáriu Estadu no Vise Ministru ida sai bá liur, maibé problema ne’ebé relevante ho sira nia servisu, deputadu sira sempre levanta iha PN,” nia hateten.

Nune’e, nia husu atu iha tinan 2024 membru Governu sira konsentra hodi rezolve lai problema povu nian hotu mak foin kontinua viazen bá estranjeiru.

“Ha’u ko’alia nu’udár deputadu reprezenta povu, ha’u hakarak ko’alia ida-ne’e, la’ós nu’udár bankada Governu,” nia esklarese.

Kona-bá ne’e Vise-Ministru Asuntu Parlamentár, Adérito da Costa Hugo seidauk fó komentáriu bá assuntu ne’e.

Jornalista Estajiária: Zita Menezes