Hatutan.com, (25 Marsu 2024), Díli—Ikus-ikus ne’e komesa mosu ona isu remodelasaun iha Governasaun ne’ebé lidera hosi Primeiru-Ministru (PM) Kay Rala Xanana Gusmão.

Lee Mós: Remodelasaun Sei Akontese Iha Marsu 2024

Ministru Komérsiu no Indústria (MCI), Filipus Nino Pereira. Foto/Tome da Silva

Hosi informasaun oioin ne’ebé Hatutan.com asesu katak posivel boot remodelasaun ne’e sei halo hafoin loron boot festa páskua 2024. Maske nune’e, Primeiru-Ministru Xanana Gusmão seidauk deklara ofisial atu halo remodelasaun ka lae.

Primeiru Ministru iha IX Governu Konstitusionál Kay Rala Xanana Gusmão, iha loron 04 fulan-Janeiru 2024, hateten ona katak, iha fulan-Marsu, sei halo avaliasaun bá dezempeñu servisu membru Governu sira-nian, karik la halo servisu sei tau ema seluk.

“Ha’u ko’alia ona bá membru Governu hotu iha fulan-Marsu 2024, ha’u sei la’o bá kada ministériu atu buka hatene saida mak sira halo ona, se mak la halo servisu, la serve  tenke hasai no hatama ema seluk,” PM Xanana hateten bá jornalista sira hafoin hasoru malu ho Prezidente Repúblika, José Ramos-Horta iha Palásiu Prezidensiál.

Relasiona ho isu remodelasaun, naran membru Governu ida ne’ebé posivel tama iha lista remodelasaun mak Ministru Komérsiu no Indústria (MCI, sigla portugés), Filipus Nino Pereira no sekretáriu estadu ka vise-ministru ho ministru balun tan.

Ho informasaun ne’e, Hatutan.com, Segunda (25/03/2024), halo konfirmasaun direta ho Ministru Filipus Nino Pereira, lia-tuun dehan   nia hanesan membru Governu desizaun saida de’it sei la afeita nia apoiu bá IX Governu Konstitusionál.

Filipus Nino Pereira afirma hanesan membru Governu bá Governu da-sia konsidera  remodelasaun ne’e la’ós buat foun,  ne’e nu’udár situasaun normal ne’ebé sempre akontese  iha nasaun demokratiku.

“Ne’e kompetensia Sua Exelénsia Primeiru-Ministru. Buat ne’e, buat bain-bain  ida, tanba uluk ha’u hanesan Sekretáriu Estadu Kooperativa, ha’u sente ona remodelasaun, bá ha’u ne’e buat bain-bain ida.Troka malu ne’e buat bain-bain ida, importante mak labele lakon sentidu bá nasaun hodi serbí ho fuan-laran tomak bá rai ida-ne’e” Ministru Filipus Nino Pereira hateten iha knar fatin.

Nia fundamenta tan katak remodelasaun ne’e hanesan situasaun normal no mosu  bainhira  membru Governu la bele prienxe  ezersísiu funsaun tuir portafóliu no programa ne’ebé Governu hatuur ona iha nia polítika orsamentu jerál Estadu nian.

“Iha avaliasaun mak rezultadu hatudu katak performa ladiak ita tenke  simu nia konsekuensia. Ha’u senti ona buat ida-ne’e, ne’ebe diak hela,” Nino Pereira tenik.

Durante Ministru Filipus Nino Pereira nia mandatu esforsu ona buat lubun ida hodi apoiu IX Governu Konstitusionál ho nia papel importante  apoiu  Timor-Leste nia adezaun bá Organizasaun Mundiál Komersiu (OMK).

Bá oin, Ministru Nino Perira ho ekipa MCI esforsu liután hodi prienxe lejislasaun no rekizitu  sira seluk nu’udar membru OMK no mós adezaun Timor-Leste nian bá membru ASEAN.

Jornalista : Leopoldina de Carvalho