Hatutan.com, (27 Marsu 2024), Díli- Prezidente Repúblika (PR), José Ramos-Horta husu bá Primeiru-Ministru (PM), Kay Rala Xanana Gusmão, atu halo avaliasaun bá membru Governu sira nune’e bele garante prestasaun servisu di’ak hodi serbí povu Timor-Leste.

Lee Mós: Isu Remodelasaun, Nino Pereira: Kompeténsia iha PM Xanana

Prezidente Repúblika José Ramos-Horta hato’o deklarasaun ne’e hodi hatán Hatutan.com hafoin partisipa serimónia aniversáriu PNTL iha edifísiu Batallaun Orden Públiku (BOP), Kuarta (27/03/2024).

Prezidente Repúblika, José Ramos-Horta. Foto/Elio dos Santos

“Ha’u espera katak Primeiru-Ministru halo duni avaliasaun bá membru Governu sira, tenke halo duni, besik ona tinan ida, fulan sia ona atu haree benefísiu bá rai-ne’e no mós ba avó Xanana nia lideransa nia naran rasik, IX Governu Konstitusionál nia naran rasik, nia kredibilidade atu haree,” Prezidente Repúblika José Ramos-Horta afirma.

Ramos-Horta hatutan baihira halo remodelasaun la signifika tebe sai tiha membru ida, haree tau nia iha fatin seluk karik, tanba ema ne’e bele di’ak mós mas tau nia iha fatin sala ne’e problema. Hanesan iha Inglés hateten The right man on the right place.

 “Remodelasaun la signifika duni sai, remodelasaun atu muda ida ne’e ba ne’ebá, ne’e konforme,” Ramos-Horta esplika hodi argumenta mós katak,  nia la’ós Primeiru Ministru difisil halo avaliasaun, mas importante tebe-tebes tenke halo avaliasaun bá setór ekonomia, bá sira ne’ebé liga ho ekonomia, mudansa saida iha ekonomia.

“Ema bara-barak kontinua keixa demora investidór sira hakarak hatama surat ruma, demora, demora ida-ne’e tenke haree didi’ak, se ministériu ne’ebé kaer ekonomia, kaer agrikultura, kaer saúde la’o ka la’e tanba povu haree hela,” nia tenik tan.

Jornalista : Vito Salvadór